Russiýanyň RŽD açyk paýdarlar jemgyýetiniň düzümine girýän RŽD Logistika paýdarlar jemgyýeti Russiýadan Hindistana doly düzümli konteýner otlusyny ugratdy. RŽD-niň saýtyna salgylanýan INTERFAX.RU-nyň ýazmagyna görä, otly ilkinji gezek Demirgazyk-Gündogar guryýer ugrunyň gündogar şahasy boýunça Gazagystanyň, Türkmenistanyň we Eýranyň üstünden geçer.
Ilkinji otly düzümi Moskwanyň etegindäki Çehow otly menzilinden badalga aldy.Ahyrky barmaly nokady - Nawa-Şewa deňiz gämi duralgasy (Mumbaý, Hindistan).Daşaýyş intermodal bolar: ýoluň bir bölegi deňziň üstünden geçer.
Ugruň uzynlygy 8 müň km-dan geçýär, şol ýoly çen bilen 35-37 günde geçiler.Ugur rus eksportçylaryna haryt ýerleýän bazarlaryny diňe bir Hindistanda, Pars aýlagynyň ýurtlarynda däl, eýsem, Afrikada-da giňeltmäge mümkinçilik berer diýip, RŽD-niň saýtynda aýdylýar.