Kremliň metbugat geňeşçisi Dmitriý Peskow Russiýanyň döwlet baştutany Wladimir Putiniň ABŞ-nyň 47-nji prezidenti Donald Tramp bilen telefon arkaly söhbetdeş bolmandygyny we bu babatda hiç hili meýilnamanyň bolmandygyny beýan etdi.
Kremliň metbugat geňeşçisi Dmitriý Peskow paýtagt Moskwa şäherinde metbugat işgärlerine beren beýanatynda, gün tertibiniň ileri tutulýan ugurlary barada beýannama berdi.
The Washington Postuň "ABŞ-nyň prezidenti Donald Trampyň Wladimir Putin bilen telefon arkaly söhbetdeş bolandygy, Russiýa-Ukraina urşunda dartgynlygy azaltmak barada çagyryş berendigi" baradaky habaryň nädogrydygyny aýdan Peskow: "Bular ýaly telefon söhbetdeşligi bolmady. Bu maglumat hakykata bap gelmeýär, toslama. Bu ýalňyş bir maglumatdyr" diýip belledi.
Peskow Putiniň Trampa jaň etmegi meýilleşdirip-meýilleşdirmeýändigi baradaky soraga: "Bu mesele boýunça hiç hili meýilnama ýok" diýip jogap berdi.
Putiniň Günbatarly liderler bilen aragatnaşyga geçmegi meýilleşdirmeýändigini aýdan Peskow, bu babatda hiç hili alamat almandyklaryny, emma oňa açykdyklaryny habar berdi.
Peskow Trumpyň ABŞ-nyň prezidenti wezipesine saýlanmagyndan soň Ýewropada dartgynlygyň we gorkynyň ýüze çykandygyny aýtdy.