Kitçi futbol topary ýerli çempionatyň ahyrky duşuşygynda Li Man Uorriors bilen 2:2 hasabynda deňme-deň oýnap, Gonkongyň çempiony boldy.
Şeýlelikde, bu toparyň düzüminde türkmenistanly ýarym goragçy Ruslan Mingazow hem çempionlyk medalyna eýe boldy. Transfermarkt tarapyndan 550 müň ýewro baha kesilýän futbolçy çempionatyň tamamlanan möwsüminde 18 duşuşykda 17 gezek tapawutlanyp, iň netijeli futbolçylaryň biri bolmagy başardy.
1931-nji ýylda döredilen Kitçi futbol topary taryhynda 12 gezek ýurduň çempiony bolmagy başardy. Ruslan Mingazow bolsa mundan ozal 2008-nji ýylda Aşgabadyň düzüminde Türkmenistanyň, 2010-njy ýylda Skontonyň düzüminde Latwiýanyň, 2016 ― 2017-nji ýyllaryň möwsüminde Slawiýanyň düzüminde Çehiýanyň çempiony boldy.
Kitçi şu ýylyň ýanwar aýynda Ruslan Mingazow bilen 2025-nji ýyla çenli şertnamasyny täzeledi.