Russiýanyň çempionaty “Premýer Ligada” soňky tapgyrda aşaky liga düşen 2-nji topar hem belli boldy. Çempionatda 16-njy ýeri eýelän “Arsenal” öň 2-nji liga düşüpdi. 30-njy tapgyrdan soň aşaka liga giden 2-nji topar Kazan şäheriniň meşhur topary “Rubin” boldy. Öz meýdançasynda ligada galmak üçin göreşýän “Ufa” bilen duşuşan “Rubin” 2-1 hasabynda asgyn geldi.
Oýnuň 37-nji minutynda Lisakowiçiň penalti goly bilen 1-0 öňe saýlanan kazanlylar 2-nji ýarymda derwezelerini goldan gorap bilmediler. 54-nji minutda Kamilow hasaby deňlese, 90-njy minutda Ortis “Ufany” öňe saýlady.
Soňky minutda 2-nji goly geçirden “Rubin” toparyna hasaby deňlemäge mümkinçilik boldy.Deňme-deňlikde “Rubin” 14-nji orunda galýardy we pleý-off duşuşygyna gatnaşmaly bolardy.Oýnuň 90+13-nji minutynda Lisakowiçiň uran penalti urgusy sütüne degdi. Şeýlelikde, 2-1 hasabynda utulan “Rubin” 20 ýyldan soň 2-nji liga düşdi.
“Rubin” topary türkmenistanly tälimçi Gurban Berdiýewiň tälimçiliginde 2002-nji ýylda 2-nji ligada çempionlyk gazanyp, “Premýer Liga” çykypdy.Ilkinji möwsüminde 3-nji ýeri eýelän “Rubin” 2008-nji we 2009-njy ýyllarda Russiýanyň çempiony bolupdy. Çempionlar Ligasynda we Ýewropa Ligasynda ýatdan çykmajak duşuşyklar geçiren we garaşylmadyk ýeňişler gazanan “Rubine” 2019-njy ýylyň dekabryndan bäri Leonid Sluskiý tälim berýär.
“Himki” bilen “Ufa” ligada galmak üçin 2-nji ligada (Milli futbol ligasynda) 3-4-nji ýerleri eýelän toparlar bilen pleý-off duşuşygyny geçirer. “Ufa” “Orenburg” bilen, “Himki” bolsa “SKA-Habarowsk” bilen duşuşar (25-nji we 28-nji maýda).
Ýeri gelende aýtsak, 2-nji ligada 1-2-nji ýerleri eýelän “Torpeda” bilen “Fakel” toparlary geljek möwsüm “Premýer Ligada” çykyş ederler.