Amerikan žurnaly “Forbes” 2019-njy ýylda ýokary hak tölenýän ýazyjylaryň reýtingini mälim etdi. Sanawyň başyny britan ýazyjysy Joan Rouling çekýär. Geçen ýyl onuň girdejileri 92 million dollara deň boldy.
Sanawyň ikinji ornuny 70 million dollar girdejisi bilen Jeýms Patterson eýeledi. Onuň ýylyň dowamynda 5,5 million kitaby satyldy. Ol heniz hem Amerikada baý ýazyjylaryň biri bolup, 2018-nji ýylda onuň baýlygy 800 million dollara barabar bolupdyr.
Ozalky birinji hanym Mişel Obama 36 million dollar girdejisi bilen sanawyň ilkinji üçlügini düzýär. Mişel Obamanyň “Emele geliş” (Becoming) atly ýatlamalar kitaby “Penguin Random House” neşirýaty tarapyndan dürli görnüşlerde 10 million nusgada neşir edilip, 2018-nji ýylda iň köp satylan kitap boldy.
ABŞ-nyň çagalar ýazyjysy Jeff Kinniniň “Gowşak çaganyň ýatlamalary” (Diary of a Wimpy Kid) atly kitaby ýylyň dowamynda 3,6 million nusgasy satyldy.Bu kitap 20 million dollar girdeji gazanyp, 4-nji orny eýeledi.
Onuň 14-nji kitaby noýabr aýynda çap edildi.Golaýda Kinni Fransiýanyň iň ýokary sungat we edebiýat baýragy “L’Ordre des Arts et des Lettres” bilen sylaglandy.
Stiwen King 17 million dollar girdejisi bilen üçünji orundan bäşinji orna çenli aşak düşüp, girdejileri 2018-nji ýyla garanyňda, 10 million dollar azdyr. 2018-nji ýylda ýazyjynyň “Ol” romanynyň üstünlikli ekranlaşdyrylmagy has oňat girdeji getiripdi. Şeýle hem Stiwen Kingiň adybir romany esasynda ekranlaşdyrylan “Lukman uky” filmi dünýä prokatynda 71 million dollar girdeji getirdi.
Mundan başga-da, gorkuly eserleriň awtory öz kitaplarynyň 2,1 million nusgasyny satdy.
2019-njy ýylda dünýäniň iň köp gazanýan 5 ýazyjysy ABŞ-da 18,6 million kitap satyp, jemi 235 million dollar gazandylar. Bu bolsa, 2018-nji ýyla garanyňda, 10 million dollar köpdür.