Portugaliýaly super ýyldyz Kristiano Ronaldo arap klubundaky ilkinji kubogyny asmana göterdi. 38 ýaşyndaky oýunçy Arap klublarynyň Çempionlar Kubogy ýaryşynyň finalynda 2 gol geçirip, “Al Nassryň” ýeňiş gazanmagyna uly goşant goşdy.
Saud Arabystanynyň Taif şäherinde oýnalan finalda “Al Nassr” bilen “Al Hilal” toparlary duşuşdy. Çekeleşikli geçen oýnuň 1-nji ýarymynda hasap açylmady. 2-nji ýarymyň başlarynda, has takygy, 51-nji minutda braziliýaly futbolçy Maýkl “Al Hilal” toparyny öňe çykardy.
Oýnuň 71-nji minutynda “Al Nassryň” goragçysy Al-Amri gyzyl kart aldy. Ýöne muňa garamazdan, Ronaldo we ýoldaşlary ruhdan düşmedi.Duşuşygyň 74-nji minutynda Ronaldo hasaby deňledi.Esasy wagty 1-1 deňlikde gutaran oýna goşmaça 30 minut berildi.
Duşuşygyň 98-nji minutynda Kristiano Ronaldo ýene bir gezek tapawutlanyp, toparyny öňe geçirdi.Bu gola “Al Hilal” toparyna jogap bermek başartmady.Netijede, 2-1 hasabynda ýeňiş gazanan “Al Nassr” topary taryhynda ilkinji gezek Arap klublarynyň Çempionlar Kubogyny gazanmagy başardy.
Bu şol bir wagtyň özünde Kristiano Ronaldonyň “Al Nassrda” gazanan ilkinji kubogy bolup, ol 6 gol bilen bäsleşigiň iň köp gol geçiren futbolçysy baýragyny eýeledi.Bu Ronaldonyň karýerasyndaky 34-nji kubogy hökmünde hasaba alyndy.
1981-nji ýyldan bäri geçirilip gelinýän Arap klublarynyň Çempionlar Kubogy ýaryşynyň baýrak gaznasy 10 million dollara deň bolup, çempion topara şu gezek 6 million dollar berildi. Ýaryşda “Esperans” (Tunis) hem-de “Al-Raşid” klublary 3 gezek çempion bolup, olar bu ugurda öňdeligi eýeleýärler. 3-nji gezek finalda utulan “Al Hilalyň” 2 çempionlygy bar.