NBA-nyň germaniýaly weteran basketbolçysy Dirk Nowiski topary “Dallas Maweriks” bilen şertnamasynyň möhletini ýene bir ýyl uzaltdy. Şeýlelikde, 40 ýaşyndaky basketbolçy bir klubda 21-nji möwsümini geçirer we bu babatda rekordyň ýeke-täk eýesi bolar. 1998-nji ýyldan bäri “Dallasyň” köýnekçesini geýip gelýän Nowiski häzirki wagtda rekordy 20 möwsüm “LA Leýkersde” oýnan Kobi Braýant bilen paýlaşýar. 13 gezek “All Stara” saýlanan Nowiski 2011-nji ýylda toparynyň NBA-nyň çempiony bolmagyna uly goşant goşup, ol final tapgyrynyň iň gymmatly oýunçysy saýlanypdy. 2007-nji ýylda-da adaty möwsümiň iň gymmatly oýunçysy saýlanan Nowiski NBA-da 1471 duşuşyk geçirdi.
Germaniýaly super ýyldyz bu oýunlarda ortaça, 21,2 utuk, 7,7 ribaund hem-de 2,5 asistlik görkezijiler bilen çykyş etdi.Ol NBA-nyň taryhyndaky iň köp utuk geçiren 6-njy basketbolçydyr.