Çarşenbe günki oýunda “Bawariýa” soňky çempion Real Madridi” kabul etdi.Ikisi soňky ýyllarda ýygy-ýygydan gabat gelip, şolaryň soňky 5-sinde “Real Madrid” ýeňiş gazanyp gelýärdi.
Ispan topary bu oýunda-da özüniň ýeňişli ýörelgesini üýtgetmedi.Arturo Widal, Dawid Alaba ýaly esasy oýunçylarynyň şikesi bolandygy sebäpli peýdalanyp bilmedik “Bawariýanyň” gollandiýaly ýyldyzy Arýen Robben hem eýýäm 8-nji minutda olaryň hataryna goşuldy. 28-nji minutda Joşua Kimmih garşylyklaýyn hüjümde hasaby açdy. 34-nji minutda nemes toparynyň şikeslileriniň sany hasam köpeldi. Žerom Boateng hem meýdançany terk etmeli boldy. 1-nji ýarymyň tamamlanmagyna 1 minut galanda, “Realyň” çep gyraky goragçysy Marselo jaýdar urgy bilen hasaby deňledi.
Bu onuň şu möwsümde PSŽ we “Ýuwentus” duşuşyklaryndan soň, salan 3-nji goly boldy.Ol Çempionlar ligasynyň utulan-çykdy tapgyrlarynda iň köp tapawutlanan goragçydyr (7 gol). 2-nji ýaryma Iskonyň ornuna Asensio bilen başlan Zinedin Zidan bu taktikasynyň miwesini aňryýany bilen aldy. 57-nji minutda Rafinýanyň ýalňyşlygyndan ýerlikli peýdalanan “Real” ýaş oýunçylary Lukas Waskes bilen Marko Asensionyň özara paslaşygyndan soň, 21 öňe saýlandy.
Goly Asensio derwezä girizdi. Şondan soň, oýunda üýtgän zat bolmady. Şunlukda, “Real” “Bawariýany” yzly-yzyna 6-njy gezegem ýeňip, muny başaran ilkinji topar boldy.Bu “Realyň” Çempionlar ligasyndaky 150-nji ýeňşi diýlip, hasaba alyndy. Şu möwsümde ilkinji gezek gol geçirip bilmedik Ronaldo Çempionlar ligasynda 96-njy ýeňşini baýram edip, bu ugurda ozalky topardaşy Iker Kasilýasyň rekordyny öz adyna geçirdi.
Jogap duşuşygy 1-nji maýda oýnalar.