Öz döwründe rekord baha transfer bolan uelsli ýyldyz futbolçy Garet Beýl professional karýerasyny tamamlandygyny habar berdi. 33 ýaşynda 9 ýaşynda futbola başlanda şeýle ajaýyp sepgitlere ýetjekdigi barada pikir hem etmeýändigini belläp, şu dereje gelmegine ýardam beren hemmelere özüni borçly hasaplaýandygyny aýtdy.
Ol 17 möwsümden gowrak ýokary derejede çykyş edendigini aýdyp, durmuşynda gaýtalanmajak ajaýyp pursatlara futbolyň saýasynda ýetendigini beýan etdi. 2006-njy ýylda “Southemptonda” futbola başlan Beýl 1 möwsümden soň özüne uly şöhrat getiren “Tottenham” toparyna transfer bolýar.
Bu klubda 6 möwsüm çykyş edýär. 2013-nji ýylyň tomsunda-da 100 million ýewro, şol döwür üçin rekord baha “Real Madridiň” düzümine goşulýar.Bu klubda-da Çempionlar Ligasynyň çempionlygyna 5, “La Liganyň” çempionlygyna 3, UEFA Super Kubogyna 3, FIFA Klublararasy Kubogyna 3, Ispaniýanyň Şa Kubogyna 1, Ispaniýanyň Super Kubogyna 1 gezek mynasyp bolýar. 2020/21 möwsümini “Tottenhamda” kärendesine geçiren Beýl geçen ýylyň tomsunda-da ABŞ-nyň “Los Anjeles” toparyna transfer bolýar.
Ol amerikan kluby bilenem MLS Kubogyny asmana göterýär.Klublarda jemi 553 duşuşyk geçiren Beýl şol oýunlarda 185 gezek tapawutlandy. 64 ýyldan soň Uelsiň Dünýä Kubogyna gatnaşmagyna saldamly goşant goşan Beýl milli toparda 111 gezek meýdança çykyp, şolarda 41 gol geçirdi.
Ol iki görkeziji boýunça-da Uelsiň milli ýygyndysynyň rekordynyň eýesidir.Uelsiň milli ýygyndysy 2016-njy ýylda-da Ýewropa çempionatyna gatnaşyp, ýarym finala çykypdy.Beýl şonda-da toparynyň esasy ýyldyzy bolupdy.