Dört gün öň La Ligada 35-nji çempionlygyny yglan eden Real Madrid özüniň iň söýgüli ýaryşynda-da 17-nji gezek finala adyny ýazdyrdy.Bundan bir hepde öň Angliýada oýnalan duşuşykda-da ruhdan düşmän 3 gezek 2 gol aratapawudy bilen yza galsa-da, netijede güýçli garşydaşynyň derwezesinden 4 gola garşylyk 3 gol geçiripdi. Şu möwsümde Real Madridiň oýnuň soňuna çenli göreşi berk dowam etdirýändigine doly şaýat bolduk.
Ol ýarym finalyň jogap duşuşygynda-da şeýle boldy.Duşuşyga iňlis kluby erjel başlady.Pepiň şägirtleri birnäçe howply urgular, hüjümler döretselerem, olara derwezeçi Tibo Kurtuany geçmek başartmandy.Duşuşygyň 73-nji minutynda Bernardo Silwanyň pasyndan soň owadan urgy bilen Riýad Mahrez hasaby açmagy başardy.
Bu goldan soň azda-kände goraga geçip arkaýynlaşan Mançester Siti topary 87-nji minutda Jek Griliş bilen 2 sany amatly pursatdan peýdalanyp bilmedi. Ýöne bu ýaryşda köp çarşenbäni başdan geçiren Real Madridiň aşygy ýene-de alçy gopdy. Ýogsam soňky minutlara çenli Real Madridiň derwezä gabat gelen takyk urgusy hem ýok diýen ýalydy. 90-njy minutda sag gyradan geçirilen pasda topy Benzema oýna 68-nji minutda giren Rodrigonyň öňüne oklady.
Ol hem goragçylardan hem-de derwezeçiden öňürdip, topy derwezä girizdi.Birden janlanan Real Madrid bu goldan 90 sekunt soň, ýagny 90+1-nji minutda ýene-de sagdan geçirilen hüjümde Karwahalyň jerime meýdançasynyň içine gönükdiren topuna Asensio kellesi bilen çalaja degýär we şol topa ýene-de Rodrigo batly urup, bu gezek iki duşuşygyň hasabyny deňledi.
Netijede, finalçy goşmaça 30 minutda kesgitlenmeli boldy. 95-nji minutda emin Realyň peýdasyna penalti urgusyny belledi.Bu urgyny-da Karim Benzema dürs urup, toparyna ýeňiş getiren oýunçy boldy.
Bu onuň şu möwsümdäki 15-nji goly hökmünde hasaba alyndy.Duşuşygyň galan minutlarynda Real oýny goragda geçirdi.Mançester Siti welin eden hüjümlerinden oňyn netije alyp bilmedi. Şeýlelikde, 3-1, umumylykda hasapda-da 6-5 öňe saýlanan Real Madrid 17-nji gezek finala çykdy.
Soňky 7 finalynda kubogy eýelän Real Madridiň tälimçisi Karlo Ançelotti bolsa Çempionlar Ligasynda 5 gezek finala çykan ilkinji tälimçi boldy.