Türkmenistanly derwezeçi Rahat Japarowyň çykyş edýän Abdyş-Ata kluby futbol boýunça Gyrgyzystanyň çempionatynyň 2022-nji ýylky möwsüminiň çempiony boldy.
25-nji tapgyrda turnir tablisasynyň ikinji ornundaky Alaýyň Ilbirs bilen deň oýnamagy Abdyş-Atanyň esasy garşydaşyndan 6 utuk öňe saýlanyp, wagtyndan öň çempion bolmagyna getirdi. Has takygy, şol deňlikden soň utuklarynyň sanyny 47-ä ýetiren Alaý 53 utuk bilen birinji ýerde barýan Abdyş-Atadan öňe geçmek mümkinçilini ýitirdi. Şeýlelikde, Abdyş-Ata wagtyndan öň çempionlyk titulyny özüniňki etdi.
25-nji tapgyrdaky oýnuny heniz geçirmedik Abdyş-Atanyň hasabynda 24 oýundan soň 16 ýeňiş, 5 deňlik we 3 ýeňliş bar.
Ýeri gelende bellesek, Abdyş-Ata futbol boýunça Gyrgyzystanyň çempionatynda altyn medaly eýelän taryhdaky dokuzynjy topar boldy.Häzirki wagtda bu babatda 13 gezek çempionlygyny baýram eden Dordoý topary öňdebaryjy hasaplanýar.
Futbol boýunça Gyrgyzystanyň çempionaty 1992-nji ýyldan bäri yzygiderli geçirilip, onuň mundan ozalky bassyr dört möwsüminde Dordoý topary çempion bolupdy.Gyrgyzystanyň çempionatynyň bu ýylky ýeňijisi 2023-nji ýylda AFK Kubogynyň toparçalaýyn tapgyrynda çykyş eder.
Maglumat üçin, 26 ýaşly türkmenistanly derwezeçi Rahat Japarow 2022-nji ýylyň ýanwar aýynda Abdyş-Atanyň düzümine goşuldy. Ol sentýabr aýynda topary bilen Gyrgyzystanyň Kubogynyň hem eýesi boldy.
Abdyş-Ata Gyrgyzystanyň güýçli toparlarynyň biri bolup, ol 2001-nji ýylda esaslandyrylýar. Topar häzire çenli bir gezek Gyrgyzystanyň çempiony, alty gezek wise-çempiony boldy. Şeýle-de bäş gezek futbol boýunça Gyrgyzystanyň Kubogyny eýeläp, bir gezek ýurduň Superkubogyna mynasyp boldy.