Abdyş-Ata futbol toparynyň türkmenistanly derwezeçisi Rahat Japarow Gyrgyzystanyň Premýer ligasynyň 2022-nji ýyldaky Iň gowy derwezeçisi diýlip yglan edildi. Bu barada liganyň metbugat gullugy habar berýär.
Geçen ýylyň futbol möwsüminiň iň gowy wekillerini saýlamak üçin toparlaryň tälimçileriniň, kapitanlarynyň, komissarlaryň, sport žurnalistleriniň we sport jemgyýetçiliginiň beýleki käbir wekilleriniň gatnaşmagynda ses berlişik geçirildi. Ses berenler geçen möwsümiň iň gowy derwezeçisi hökmünde türkmenistanly derwezeçini saýladylar.
Gyrgyz ligasynyň geçen möwsüminde Rahat Japarow 21 duşuşykda derwezäni gorap, şolaryň 13-sinde goraýan derwezesinden bir pökgi hem geçirtmedi. Garşydaş toparlaryň futbolçylary möwsümiň dowamynda onuň goraýan derwezesinden 11 pökgi geçirip bildiler.
26 ýaşly Rahat Japarowa Abdyş-Atada geçen ýylyň ýanwaryndan bäri çykyş edip gelýär. Ol toparyň düzüminde ýurduň çempiony boldy we Gyrgyzystanyň kubogyny eýeledi.
Transfermarkt Rahat Japarowa 250 müň ýewro baha kesýär.
Rahat Japarowyň 2021-nji ýylda Täjigistanda hem iň gowy derwezeçi hökmünde ykrar edilendigini ýatladýarys. Ol 2019-njy ýyldan bäri Türkmenistanyň futbol boýunça milli ýygyndysynyň hem agzasydyr.