Türkmenistanyň demirgazyk welaýatynda Migrasiýa gullugynyň täze bölümleri işläp başlady. Bu, birnäçe aý uzaga çekýän nobatlaryň arasynda we pasport almaga synanyşýan onlarça adamyň muňa öz nägileligini açyk bildirmegine degişli birnäçe wakadan soň boldy.
Migrasiýa gullugynyň täze bölümleri Daşoguzyň dört etrabynda açyldy. 5-nji iýunda migrasiýa bölümleri Görogly, Akdepe, Boldumsaz, Ruhubelent etraplarynda işläp başlady.
"Bölümler pasport bermek üçin resminamalary eýýäm kabul edýärler. Pasport edinmek isleýänler kän" - diýip, habarçymyz ýüz tutýanlaryň aglaba böleginiň Türkiýede, Russiýada, Polşada we beýleki ýurtlarda işleýän ýa-da okaýan türkmen raýatlarydygyny belledi. Olar pasportlarynyň möhleti geçensoň täze pasport almak üçin ýurduna dolanmaga mejbur bolupdyr.
Mundan öň Daşoguz welaýatynda migrasiýa gullugynyň diňe iki şahamçasy işleýärdi, olar Daşoguz we Köneürgenç şäherlerinde ýerleşýär.
Demirgazyk sebitde birbada Migrasiýa gullugynyň birnäçe täze şahamçasynyň açylmagy ýerli ilatyň nobatlar bilen baglanyşykly köpçülikleýin nägilelik bildirip, geçiren çykyşlarynyň yzýanyna gabat geldi. Azatlyk Radiosynyň habarçylarynyň maglumatlaryna görä, diňe Daşoguzda maý aýynyň ikinji ýarymynda adamlar migrasiýa gulluklarynda pasport nobatlary sebäpli azyndan bäş gezek köpçülikleýin nägilelik görkezipdir.
"Pasport almaga synanyşýanlaryň köpüsi daşary ýurtlardan gelen türkmen raýatlary, olar nägileligini aç-açan aýdýarlar. Görnüşinden, nägilelikleriň güýçlenmegi häkimiýetleri ilatyň zerurlyklaryny kanagatlandyrmagyň zerurlygy barada pikirlenmäge täze migrasiýa bölümleri açmaga mejbur etdi" - diýip, anonim gürleşen ýerli çeşme aýtdy.
Azatlyk Radiosynyň Türkmenistanyň Migrasiýa gullugynyň wekillerinden resmi maglumat almak üçin eden synanyşyklary netije bermedi.
Ilatyň daşary ýurtlara syýahat etmek üçin biometriki pasport edinmek islegleri barha artýar. Pasport üçin dokumentleri tabşyrmagyň nobatlary ýylyň başyndan bäri ep-esli uzady. Ýurduň käbir sebitlerinde nobata garaşmagyň wagty birnäçe aý uzaga çekýär, beýlekilerde pasportlaryň berilmegi käbir pursatlarda doly togtadyldy. Hususan-da, Lebap welaýatynda pasport almak üçin dekabr aýyna nobata ýazylmaly bolýar.
Bu aralykda, ýurtdan migrasiýa akymy artýar. Uzaga çeken ykdysady krizis, işsizlik, korrupsiýa, aýlyk haklarynyň yzygiderli gijikdirilmegi, häkimiýetleriň ilata edýän gözegçiligi we basyşy ilat arasynda ýurdy terk etmek islegleri güýçlenýär.
Soňky aýlarda ýurtdan çykýan raýatlaryň arasynda ilatyň maddy taýdan kadaly hasaplanýan gatlagyny emele getirýän býujet edaralarynyň işgärleri köp duş gelýär. Habarçynyň sözlerine görä, diňe Daşoguz welaýatynda bilim we saglygy saklaýyş edaralarynyň ýüzlerçe işgäri ýakynda işini terk edipdir.
"Köpler işini taşlap, BAE, Türkiýe we Russiýa gidýärler. Ýokary bilimli hünärmenler bu aýlyk bilen ýaşap bilmeýärler. Lukmanlar 10 sagat işleseler-de, maşgalalaryny ekläp bilmeýärler" - diýip, Daşogzuň döwlet edaralarynyň biriniň işgäri aýtdy.
Türkmenistanda iň pes aýlyk 1160 manat, ýagny Türkmenistanyň Merkezi Bankynyň kursy boýunça 331,4 ABŞ dollaryna, gara bazaryň nyrhy boýunça - 60 ABŞ dollaryna barabar.
2013-nji ýylda dolanyşa girizilen biometrik pasporty Türkmenistanyň raýatynyň ýurtdan çykyp, yzyna dolanmagyna mümkinçilik berýän dokumentdir.
Türkmenistan raýatlaryna diňe ýurduň içinde pasport almaga mümkinçilik berýär. Başga ýurtlaryň köpüsinden tapawutlylykda daşary ýurtlardaky türkmen diplomatik wekilhanalary raýatlara pasport bermeýär.
Rus dilinde hem okaň
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.