Prezident Gurbanguly Berdimuhamedow dynç günleri “adaty endigine eýerip, egindeşleri bilen paýtagtymyzdaky Olimpiýa şäherçesinde sport maşklaryny ýerine ýetirdi, şeýle-de emeldarlary türkmen sportundaky ýaramaz netijeler sebäpli tankyt etdi. Bu barada 9-njy dekabrda TDH habar berdi.
Neşiriň ýazmagyna görä, döwlet baştutany Türkmenistanyň Milli sport we syýahatçylyk institutynyň täze gurulýan binalar toplumynyň gurluşygynyň dowam edýän ýerinde alnyp barylýan işler bilen tanyşdy. Bu ýerde ony Ministrler kabinetiniň başlygynyň orunbasarlary, Aşgabat şäheriniň häkimi hem-de Milli sport we syýahatçylyk institutynyň rektory garşylady.
Sport we ýaşlar syýasaty ministri Daýanç Gulgeldiýew döwlet baştutanuny paýtagtda gurluşygyna başlanan desgalaryň taslamalary, olaryň çyzgylary bilen tanyşdyrdy, şeýle hem binalaryň bezeg aýratynlyklary we üpjünçiligi barada habar berdi.
Bu ýerde Baş meýilnama laýyklykda, Milli sport we syýahatçylyk institutynyň Sportuň olimpiýa görnüşleri fakultetiniň, 450 orunlyk umumy ýaşaýyş jaýynyň, köpugurly sport toplumynyň binalary, dynç alyş zolaklarynyň, awtoduralga, welosiped we ylgaw zolaklarynyň, tehniki desgalaryň we suw howdanynyň desgalary ýerleşdiriler. Şeýle hem bu ýerde Sport we ýaşlar syýasaty ministrliginiň binasy gurlar.
Ýatladýarys, bu fakulteti maý aýynda, Türkiýäniň “Ýimpaş” söwda merkeziniň ýerleşen ýerinde gurmaga başladylar.
Neşiriň maglumatyna görä, prezident Sport we ýaşlar syýasaty ministrliginiň edara binasynyň birinji gatynda Türkmenistanyň milli sportunyň garaşsyzlyk ýyllary içinde gazanan üstünlikleri we ýeten derejesi bilen tanyşdyrýan ýörite zalyň döredilmeginiň maksadalaýyk boljakdygyny belledi.
1 of 6
Bellenip geçilmegine görä, häzirlikçe türkmen türgenleriniň halkara derejede geçirilýän sport ýaryşlarynda gazanýan netijeleri bildirilýän talaplara doly laýyk gelmeýär. “Mysal üçin, türkmen ştangaçylary Agyr atletika boýunça Aşgabatda geçirilen dünýä çempionatynda ýokary netije gazanyp bilmediler.
Berdimuhamedow institutyň bu ugurda alyp barýan işleri babatda rektora düýpli nägilelik bildirip, okuw işine çemeleşmelere we usullara täzeden seretmegi talap etdi” diýip, TDH ýazýar.
Prezident ýurtda iň döwrebap hem-de doly bahaly sport düzümleriniň döredilendigini, zehinli ýaşlary höweslendirmek ulgamynyň hem hut şoňa gönükdirilendigini belledi. Ýöne bu mümkinçilikler doly derejede peýdalanylmaýar.
Wise-premýer Pürli Agamyradowa ýüzlenip, prezident “sport ulgamynda alnyp barylýan işleriň netijeliligini ýokarlandyrmak bilen baglanyşykly meselelere talaby güýçlendirmegi” tabşyrdy, täze hünär boýunça bilim bermäge niýetlenen binanyň gurulmagy bilen, bu ýerde “diňe sport ulgamyna degişli hünärmenleriň, ussat türgenleriň, tälimçileriň taýýarlanylmagyny degişli derejede ýola goýmak gerek” diýdi.
Şeýle-de prezident Türkmen döwlet medeniýet institutynda syýahatçylyk boýunça bilim berýän bölümiň döredilmegini buýurdy, ol ýerde syýahatçylyk ugurlarynyň okadyljakdygyny, atçylyk pudagyna dahylly ugurlaryň hemmesiniň atçylyga degişli guruljak täze ýokary okuw mekdebinde jemlenilmelidigini aýtdy.
Gurbanguly Berdimuhamedow doping bilen baglanyşykly meseleler halkara derejede ykrar edilen talaplara laýyk gelmelidir diýip belledi. Mundanam başga, türgenleriň iýmitlenmek meselelerine aýratyn üns bermeli, olaryň taýýarlyk derejesi we ýokary netijeleri gazanmagy iýmitlenmeginiň guralyşyna bagly bolar.
Soňra prezident Olimpiýa şäherçesiniň sport toplumynda egindeşleri bilen sportuň birnäçe görnüşi bilen meşgullandy we dürli sport maşklaryny ýerine ýetirdi, bouling oýnyunda utuş gazandy.
Belleýäris, türkmen sportsmenleri birnäçe gezek doping ulanmakda tutuldy. 2017-nji ýylyň 7-nji aprelinde ýurtda Dopinge garşy milli agentlik döredildi. 2018-nji ýylyň noýabrynda Türkmenistanyň Agyr atletika boýunça federasiýasyna dopingde tutulan we oýundan çetleşdirilen sportsmeni ulanandygy sebäpli WADA-nyň sanksiýalarynyň wehim salýandygy belli boldy.
Gurbanguly Berdimuhamedow 12-nji noýabrda türkmen ştangaçylarynyň Aşgabatda agyr atletika boýunça geçirilen we 10-njy noýabrda tamamlanan Dünýä çempionatynda gazanan netijelerinden nägileligini bildirdi.
Türkmenistan çempionatyň netijeleri boýunça 16-njy orny eýeledi. Türkmenistandan diňe bir türgen 21 ýaşyndaky Ýyldyz Jumabaýewe öz agram kategoriýasynda 45 kg çenli agramda üç medal iki kümüş, bir bürünç almagy başardy.