29-njy noýabrda Türkmenistanyň Hytaý Halk Respublikasyndaky Ilçihanasy Türkmenistanyň Prezidenti Gurbanguly Berdimuhamedowyň hytaý dilinde neşir edilen Türkmeniň döwletlilik ýörelgesi atly kitaby bilen tanyşdyrylyş geçirdi.
HHR-yň Milli nebitgaz korporasiýasynyň (CNPC) baş edarasynyň kabul edişler zalynda geçirilen çärä ýurdumyzyzň diplomatik wekilhanasynyň işgärleri, HHR-yň DIM-niň Ýewropa we Merkezi Aziýa Departamentiniň ýolbaşçysynyň orunbasary hanym Lýu Szinpin, HHR-yň Türkmenistandaky täze ilçisi Sýan Naýçen, CNPC korporasiýasynyň wise-prezidenti PetroChina kompaniýasynyň prezidenti Duan Lýanweý, professor Hu Çženhua, Hytaýyň daşary ýurtlar bilen dostluk halk jemgyýetiniň, Hytaýyň Energetika döwlet müdirliginiň wekilleri, resmi adamlar, KHBS we beýlekiler gatnaşdylar.
Dabarada HHR-yň DIM-niň Ýewropa we Merkezi Aziýa Departamentiniň ýolbaşçysynyň orunbasary hanym Lýu Szinpin, CNPC-niň wise-prezidenti PetroChina kompaniýasynyň prezidenti Duan Lýanweý we Türkmenistanyň ilçisi Parahat Durdyýew çykyş etdiler.
Ilçi P. Durdyýew öz çykyşynda Türkmenistanyň Prezidenti Gurbanguly Berdimuhamedowyň täze işiniň daşary ýurtda ilkinji akademiki terjimesiniň Hytaý Halk Respublikasynda ýerine ýetirilendigine ünsi çekdi. Kitap dostlukly hytaý halkyna türkmen halkynyň medeniýeti we dünýagaraýşy bilen tanyşmaga, ynsanperwerlik, myhmansöýerlik, parahatçylyksöýüjilik, dostluk, döredijilik, ahlak we mertebe ýaly müdimi umumadamzat gymmatlyklary beýanyny tapan türkmenleriň milli ýörelgelerine has gowy düşünmäge mümkinçilik berer.
Köpugurly türkmen-hytaý gatnaşyklary barada gürrüň edip, ýurdumyzyň diplomatik wekilhanasynyň ýolbaşçysy CNPC -niň we PetroChina-nyň ÝET ulgamynda özara peýdaly hyzmatdaşlygy ösdürmäge goşandyny belledi.
Hytaý Halk Respublikasynyň Ýewropa we Merkezi Aziýa Departamentiniň ýolbaşçysynyň orunbasary öz çykyşynda Türkmenistanyň Prezidentiniň täze kitabyndan salgylanmalary getirip, hytaýly okyjylaryň türkmenleriň milli özboluşlylygyny görkezýän däp-dessurlary barada gyzykly we peýdaly maglumatlaryň köpüsini alyp biljegine ynam bildirdi.
Öz gezeginde, CNPC-niň wise-prezidenti PetroChina kompaniýasynyň prezidenti Duan Lýanweý öz kompaniýasynyň türkmen-hytaý ynsanperwer gatnaşyklaryny ösdürmäge goşýan goşandyna buýsanýandygyny nygtady, döwlet Baştutanynyň täze eseri onuň ýardam bermeginde hytaý diline terjime edildi.
Dabaranyň ahyrynda myhmanlaryň ählisine Türkmenistanyň Prezidenti Gurbanguly Berdimuhamedowyň hytaý dilinde neşir edilen Türkmeniň döwletlilik ýörelgesi kitaby ýadygärlik sowgady hökmünde gowşuryldy.