Pariž 2024-de erkekleriň arasyndaky futbol ýaryşynda Ispaniýanyň Olimpiýa topary çempionlyk gazandy. Olar Pariždäki “Park de Prens” stadionynda oýnalan finalda ýer eýeleri Fransiýany goşmaça wagtda 5-3 hasabynda ýeňdi.
Ilkinji bolup hasaby fransuzlar açan hem bolsa, ispanlar duşuşygyň 30-njy minuty dolmanka 3-1 öňe saýlandylar. 2-nji ýarymda soňky 11 minutda fransuzlar hasaby deňlese-de, ispanlar goşmaça 30 wagtda 2 gol geçirmegi başardy.
Duşuşykda Fransiýanyň gollaryny 11-nji minutda Millo, 79-njy minutda Akliuçe, 90+3-nji minutda penaltiden Mateta geçirdi.Ispanlardan 18-nji we 25-nji minutlarda Fermin Lopes, 28-nji minutda Baena, goşmaça wagtda, 100-nji we 120+1-nji minutlarda Kamelýo tapawutlandy.
Şeýlelikde, Ispaniýanyň ýygyndysy 1992-nji ýyldan soň 2-nji gezek Olimpiýa oýunlarynyň çempiony bolmagy başardy.Olar 1920-nji, 2000-nji we 2020-nji ýyllarda-da finalda ýeňlipdi.
Ispaniýanyň ýygyndysy Ýewropa çempionatyndan soň Olimpiýa oýunlarynyň hem çempionlygyny gazanyp, bir ýylyň dowamynda bu iki ýaryşda ýeňiji bolan 2-nji ýurt hökmünde hasaba alyndy.Bu ugurda 1-nji ýurt Fransiýa bolup, olar 1984-nji ýylda Ýewropanyň çempionlygyny hem-de Olimpiýa oýunlarynyň altyn medalyny gazanypdylar.
Fransiýanyň Olimpiýa ýygyndysy 40 ýyldan soň 2-nji gezek altyn medal gazanmak mümkinçiligini elden giderdi.Fransuzlar 1900-nji ýyldaky Parižde geçirilen Olimpiýa oýunlaryndan 124 ýyl soň ýene-de bu şäherde guralan Olimpiadanyň futbol ýaryşynda kümüş medal gazandy. 1900-nji ýylda Beýik Britaniýa altyn medala eýelik edipdi. Şol bir wagtyň özünde Fransiýa EURO 2016-dan soň Pariž 2024-de hem öz meýdançasyndaky finalda ýeňlişe sezewar boldy.