Ozal habar berşimiz ýaly, Türkmenistanyň daşary işler ministri R.Meredowyň ýolbaşçylygyndaky türkmen wekiliýeti Pakistan Yslam Respublikasynda saparda bolmagynyň çäklerinde birnäçe duşuşyklary geçirdiler.
23-nji iýulda Türkmenistanyň daşary işler ministri Raşid Meredow bilen Pakistan Yslam Respublikasynyň daşary işler ministri Muhammet Yshak Daryň arasynda duşuşyk geçirildi.
Duşuşygyň dowamynda dürli ugurlardaky ikitaraplaýyn hyzmatdaşlygyň möhüm meseleleriniň giň toplumy ara alnyp maslahatlaşyldy.Pakistanyň daşary syýasat edarasynyň resmi beýanatynda bellenilmegine görä, geçirilen gepleşikleriň jemleri boýunça köpçülikleýin habar beriş serişdeleri üçin metbugat maslahaty geçirildi.
Onuň dowamynda dostlukly döwletleriň daşary işler ministrleri gepleşikleriň barşynda iki ýurduň arasynda ýola goýlan köp ugurly strategik hyzmatdaşlygyň häzirki ýagdaýy we ony bar bolan mümkinçilikler esasynda has-da ýokarlandyrmak boýunça anyk ugurlaryň ara alnyp maslahatlaşylandygyny bellediler.
Ministr Muhammet Yshak Dar Pakistan bilen Türkmenistanyň arasyndaky gatnaşyklaryň sebitde parahatçylyk we gülläp ösüş baradaky umumy düşünjelere esaslanýandygyny belledi. Şunda iki ýurduň ýokary derejeli ýolbaşçylarynyň özara saparlarynyň ähmiýetine üns çekildi. Şunuň bilen baglylykda, ministr: ...Pakistanlylar türkmen halkynyň Milli Lideri Gurbanguly Berdimuhamedowyň Pakistana boljak saparyna sabyrsyzlyk bilen garaşýarlar diýip belledi.
Pakistanyň daşary syýasat edarasynyň ýolbaşçysynyň bellemegine görä, Türkmenistanyň Halk Maslahatynyň Başlygynyň dostlukly döwlete sapary iki halkyň has irki döwürlere uzaýan dostlukly gatnaşyklarynyň we baý mümkinçiliklere esaslanýan strategik hyzmatdaşlygynyň taryhynda örän möhüm waka öwrüler.