Türkmenistanyň Ahal topary AFK Çempionlar ligasynyň üçünji tapgyrynda Özbegistanyň Pahtakory bilen duşuşar. Oýun 24-nji oktýabrda Aşgabat wagty bilen sagat 19:00-da Daşkent şäherindäki Bunýodkor stadionynda geçiriler.
AÇL-iň üçünji tapgyrynyň oýnuna Türkmenistanyň çäginde IPTV ulgamynda elýeterli bolan Täjigistanyň Futbol HD hem-de Özbegistanyň Sport teleýaýlymlarynyň üsti bilen göni ýaýlymda tomaşa edip bolar.
Ýeri gelende ýatlatsak, AFK Çempionlar ligasynyň A toparçasynda iki tapgyryň jemleri boýunça Al-Aýn topary 6 utuk bilen turnir tablisasynda liderlik edýär.Ahal we Al-Feýha toparlarynyň bolsa hersinde 3 utuk bar. Heniz utuk gazanyp bilmedik Pahtakor toparçada iň soňky orny eýeläp dur.
Pahtakor — Ahal oýnuna ýaponiýaly referiler eminlik ederler. Oýnuň baş emini hökmünde Zýumpeý Iida jürlewük çalasa, oňa iki gapdalda ildeşleri Isao Nişihasi we Kota Watanabe ýardam ederler. Dördünji eminiň wezipesini Hiroki Kasahara, VAR-daky eminleriň wezipesini bolsa Ýusuke Araki we Ýudaý Ýamamoto ýerine ýetirerler.