Badahşan welaýat Şurasynyň wekli Hüjjetullah Hyrdamand metbugata beren beýanatynda, Talibanly başbozarlaryň takmynan 2 hepde ozal Täjigistan, Hytaý we Pakistan ýaly ýurtlar bilen serhetdeş bolan Badahşan welaýatynyň merkezi şäheri bolan Feýzabad şäherine garşy hüjüme geçendigini habar berdi.
Hüjümiň 3 gezek yzyna serpikdirilendigini aýdan Hyrdamand, howpsuzlyk güýçleriniň düýn gije welaýatyň merkezi bolan Feýzabad şäherinden çekilendigini aýan etdi.
Hyrdamand, Talibanyň welaýatyň merkezini dolulygyna gözegçiligi astyna alandygyny beýan etdi.
Düýn bolsa ýurdyň demirgazygyndaky Baglan we günbataryndaky Farah welaýatlarynyň merkezleri Talibanyň gözegçiligine geçipdi.
Owganystanyň demirgazygyndaky welaýatlaryň merkezi şäherleriniň yzly-yzyna Talibanyň gözegçiligine geçmeginden soň, ýurdyň Prezidenti Aşraf Gani, syýasy liderler Marşal Raşid Dostum, Muhammed Muhakkik, Juma Han Hamdard bilen Balh welaýatynyň merkezi Mazary Şerif şäherine bardy.
Balhyň welaýat häkimliginden berilen beýanatda, Prezident Aşraf Ganiniň syýasy liderler we Balh welaýatynyň ýerli resmileri bilen howpsuzlyk maslahatyny geçirendigi habar berildi.
Beýanatda ýurdyň demirgazygyndaky howpsuzlyk meseleleriniň ele alynandygy aýan edildi.
Raşid Dostumyň metbugat sekretary Habiburahman Kuýaş bolsa maslahatda Talibanyň gözegçiligine geçen demirgazyk we demirgazyk-gündogar welaýatlarynda giň-gerimli operasiýalaryň geçirilmeginiň üstünde durulyp geçilendigini mälim etdi.
ABŞ-nyň Owganystandan harby güýçlerini çekmek baradaky kararyndan soň hüjümlerini barha artdyran Taliban, ýurdyň Orta Aziýa bilen arabaglanşygyny üpjün edýän demirgazyk welaýatlarynyň merkezlerini yzly-yzyna basyp alýar.
Taliban soňky 6 günde biri ülkäniň günorta-günbatarynda, biri günbatarynda, beýleki ýedisi bolsa demirgazygynda we demirgazyk-gündogarynda bolmak bilen jemi 9 welaýatyň merkezini Owgan howpsuzlyk güýçlerinden basyp aldy.
Owganystanyň hökümeti 34 welaýat merkeziniň 25-sini entegem öz gözegçiligine saklaýar.