Owganystandaky iň uly elektrik kompaniýasy bolan Da Afghanistan Breshna Sherkat (DABS) we Türkmenistan Energetika ministrliginiň Türkmenistan — Owganystan — Pakistan halkara elektrik energiýasy taslamalary bölüminiň başlygy Myrat Artykowyň ýolbaşçylygyndaky türkmen wekiliýeti Hyrat welaýatyndaky Nurul-Jihad kiçi bekedini döwrebaplaşdyrmak taslamasynyň gidişini ara alyp maslahatlaşmak üçin ýygnak geçirýär. Bu barada DABS-yň metbugat beýanatynda aýdylýar.
Taraplar resminamalary taýýarlamak we taslamanyň öz wagtynda tamamlanmagyny üpjün etmek ýaly taslamanyň möhüm taraplaryna degip geçdiler. DABS-yň ýolbaşçylary tehniki wekiliýetleriň dowam edýän ýygnaklarynda teklipleri gutarnykly ýagdaýa getirmegiň we desgany enjamlaşdyrmak boýunça bilelikdäki ylalaşygy gazanmagyň möhümdigini aýtdy.
Türkmen wekiliýeti hyzmatdaşlygy üçin DABS-a hoşallyk bildirip, elektrik we tehniki taslamalary satyn almak bilen baglanyşykly meseleleri çözmekde bilelikdäki çekişmeleriň möhümdigini belledi.
Türkmenistanyň we DABS-yň tehniki wekiliýetleriniň arasyndaky duşuşyk ikitaraplaýyn teswirnama gol çekilmegi bilen tamamlanar diýip, çeşme belleýär.
Hyratdaky Nurul-Jihad kiçi bekediniň döwrebaplaşdyrylmagy Türkmenistandan elektrik energiýasynyň importynyň köpelmegi bilen bir hatarda Owganystanyň Demirgazyk—Günbatar zolagynda elektrik ýetmezçiligini ep-esli azaldar diýlip garaşylýar. Elektrik ýetmezçiligi meselesiniň çözülmegi içerki önümçiligiň ösmegine, ykdysady ösüşe, oba hojalygynyň ilerlemegine we sebitdäki iş depginine oňyn täsir eder.