Adamlar irki döwürlerden bäri haýsydyr bir sport bilen meşgullanypdyrlar.Sport saglygyňy berkitmäge, çalasynlygyňy, hüşgärligiňi artdyrmaga hem-de beýleki ukyplaryňy kämilleşdirmäge ýardam edýär. Şol sebäpli dürli halklarda sportuň dürli görnüşi we oýunlary peýda bolýar.
Häzirki wagtda dünýäniň dürli döwletleriniň gatnaşmagynda geçirilýän Olimpiýa oýunlarynyň taryhy hem irki döwürlere baryp ýetýär.Ilkinji Olimpiýa oýunlary miladydan ozalky 776-njy ýylda Gresiýanyň Olimp dagynyň (Gresiýanyň iň beýik dagy, beýikligi 2917 m) golaýyndaky adybir sebitde geçirilipdir.
Häzirki wagtda ulanylýan Olimpiýa sözi hem şol at bilen baglanyşyklydyr.Ilkibaşda bu ýerde türgenler öz aralarynda ylgamak boýunça bäsleşipdirler.Bir gün dowam edýän ýaryşda ini 32 metrlik, uzynlygy 192 metrlik ylgaw ýoly geçilipdir.
Bu oýunlar ýeňil atletikanyň kämilleşmegine şert döredipdir.Soňky ýyllarda dürli aralyklarda dürli oýunlar guralypdyr.Wagtyň geçmegi bilen boks, göreş, at arabaly ýaryşlar hem goşulyp, olimpiadanyň dowamlylygy 5 güne ýetirilipdir.
Ilki 8 ýyldan bir gezek geçirilýän bäsleşikler, soňlugy bilen, 4 ýyldan geçirilip başlanypdyr.Bu ýaryşlara gatnaşjak türgenler ýaryşyň bir aý öňünden taýýarlanypdyrlar.Miladydan ozalky 146-njy ýylda bu oýunlar Afinyda geçirilip başlanýar.
Bu däp biziň eýýamymyzyň 392-nji ýylyna çenli dowam edýär.Ýaryşda üstün çykan has dogrusy pellehana ilkinji bolup gelen türgene zeýtun şahajyklaryndan örülen täç geýdirilipdir. Şäher merkezinde bolsa, “Prytaneion” atly myhmanjaýda olar üçin ýörite dabara geçirilipdir.
Has tapawutlanan türgenleriň heýkeli oturdylypdyr we olar dürli ýeňilliklerden peýdalanypdyrlar.Ýaryşyň geçirilýän ýerindäki ylgaw ýodasyna “stadium” diýlipdir. “Stadium aýak üstünde durmak” diýmegi aňladýar. Şol döwürler türgenleriň bäsleşige aýak üstünde tomaşa edýändikleri üçin şeýle at berlipdir.
Bu söz ilki türgenleriň ylgaýan ýodasy üçin däl-de, ör turup ýaryşa syn edýän tomaşaçylar üçin ulanylypdyr.Paýtagtymyzda geçiriljek “Aşgabat 2017” oýunlarynda hem sportuň beýleki görnüşleri bilen bir hatarda ýeňil atletika boýunça ýaryşlar guralar.
Onuň çäklerinde 18-20-nji sentýabr aralygynda Ýapyk bina ýeňil atletika toplumynda geçiriljek ýaryşyň netijesinde 26 gezek medal gowşurylyş dabarasy geçiriler.