Dünýäniň iň eý görülýän futbol çempionaty hasaplanýan Angliýanyň “Premier Ligasynyň” ýene bir möwsümi taryha altyn harplar bilen ýazyldy. Çempion soňky tapgyryň hem soňky minutlarynda belli bolup, ýene bir ýola Pep Guardiolanyň tälimçiligindäki “Mançester Siti çempionlygyny baýram etdi. 38-nji tapgyra “Liwerpuldan” 1 utuk öňde başlan “Mançester Siti” öz meýdançasynda “Liwerpulyň” ozalky ýyldyzlaryndan Stiwen Jerrardyň tälim berýän “Aston Willa” toparyny kabul etdi.
Oýnuň 37-nji minutynda Mettýu Keş “Aston Willany” öňe çykardy. 2-nji ýarymda-da, has takygy, “Liwerpulyň” ozalky oýunçylaryndan Koutinio 2-nji goly hem “Sitiniň” derwezesinden geçirdi.Beýleki tarapda-da “Liwerpul” öz meýdançasynda “Wulwerhamptony” kabul edip, oýnuň 1-nji ýarymy 1-1 deňlikde tamamlanypdy. 3-nji Pedro Netonyň goluna 24-nji minutda Sadio Mane jogap berdi.
Ýagny şu netijelere görä, iki toparyň hem utuklary deň bolup, gol aratapawudynda “Siti” öňdedi. Ýöne “Liwerpula” çempionlyk üçin 1 gol ýeterlikdi. “Siti” bolsa, hökman ýeňiş gazanmalydy we 2-0 yzda barýardy.
Netijede, futboldaky bagt “Mançester Sitiniň” tarapynda boldy.Oýnuň 69-njy minutynda Bernardo Silwanyň ornuna meýdança giren Ilkaý Gündogan 76-njy minutda tapawutlanyp, şol bagta barýan ýolda ilkinji alawy tutaşdyrdy.
Bu goldan 2 minut soň Rodriniň batly urgusyny myhman toparyň derwezeçisine sowmak başartmady we hasap deňlendi.Bu goldan soň çempionlygyň jylawy täzeden “sitili” futbolçylaryň eline geçdi.Duşuşygyň 82-nji minutynda bolsa ýene-de Ilkaý Gündogan edil 1-nji goluny geçiren ýerinden, bu gezek aýagy bilen (ilkinjisini kelle bilen geçiripdi) topy derwezä gönükdirip, oýna, hat-da möwsüme soňky nokady goýdy.
Beýleki tarapda-da “Liwerpul” 84-nji minutda Mohamed Salahyň goly bilen öňe-de saýlandy, 89-njy minutda Andrýuw Robertsonyň goly bilen aratapawudy 3-1-e hem çykardy. Ýöne bu ýeňiş çempionlyk üçin ýeterlik bolmady.
Başgaça aýdylanda, öňki-soňky “liwerpully” futbolçylaryň çempionlyk üçin eden tagallalary “Premier Liganyň” çempionlygyna ýetmedi.” Liwerpul” topary 2-nji gezek 90 utukdan köp toplabam çempionlyk gazanyp bilmedi (2018/19 möwsüminde 97 utuk toplapdy).
Duşuşykdan soň begenç gözýaşlaryny döken Pep Guardiola soňky 5 möwsümde 4-nji gezek “Mançester Sitini” “Premier Liganyň” çempiony etmegi başardy.Bu çempionlyk hem edil 2011/12 möwsüminde Agueronyň golundan soň soňky minutlarda gazanylan taryhy çempionlyga barabar boldy. “Premier Ligada” 6-njy, Angliýanyň ýokary ligasynda-da 8-nji gezek çempion bolan “Mançester Siti” umumy sanawda “Aston Willadan” öňe saýlanyp, 5-nji orna beýgeldi.
Guardiola çempionlyk gazanmakda Mourinio, Wenger ýaly kärdeşlerinden öňe saýlanyp, 13 çempionlygy bolan Ser Aleks Fergusondan soň 2-nji ýere çykdy.Bu çempionlyk Guardiolanyň karýerasyndaky 32-nji, “Mançester Sitidäki” 11-nji kubogydyr.
Eger-de çempionlyk gazanylmadyk ýagdaýynda, şu aýyň başlaryna UEFA Çempionlar Ligasynyň ýarym finalynda soňky minutlarda 2 gol geçirdip, finalyň bosagasyndan gaýdan “Mançester Siti” toparyna we esasan hem tälimçisine şol şowsuzlykdan soň ikinji bir ýeňliş has uly urgy bolup bilerdi. Ýöne 37-nji tapgyrda “West Ham” duşuşygynda 2-0 utulyp barýarka, gazanylan 1 utuk we 38-nji tapgyrda ýene-de 2-0-dan gelip, 3-2 hasabynda gazanylan ýeňiş möwsümi 99 gol bilen tamamlan “Mançester Sitä” taryhy çempionlyk getirdi.
Gazetiň sport synçysy.