Şwesiýanyň paýtagty Stokgolmda
Nobel hepdesi tamamlandy. 12-nji oktýabrda olaryň iň soňkusy
bolan ykdysadyýet boýunça Nobel baýragynyň eýeleriniň atlary mälim edildi. Ykdysadyýet
boýunça Nobel baýragy beýleki
baýraklardan tapawutlylykda, Alfred Nobeliň mirasy däldir. Ol 1968-nji ýylda Şwesiýanyň
Milli banky tarapyndan Alfred Nobeliň hormatynda döredildi.
Ykdysadyýet boýunça
Nobel baýragynyň eýeleriniň atlary
Şwesiýanyň Korollyk ylymlar akademiýasy tarapyndan yglan edildi. Bu ýyl bu
baýragy amerikaly ykdysatçylar – 72 ýaşly Pol R. Milgrom we 83 ýaşly Robert Wilson “Auksion nazaryýetini kämilleşdirendigi we täze
auksion formatlaryny oýlap tapandyklary üçin” öz aralarynda paýlaşarlar.
“Olar diňe bir auksionlaryň nähili
işleýändigini we söwda gatnaşyjylaryň özlerini näme üçin belli bir tertipde alyp
baryşlaryny düşündirmän, eýsem, özleriniň nazary açyşlaryndan peýdalanyp,
harytlary we hyzmatlary satmak üçin düýbünden täze auksion formatlaryny oýlap
tapdylar” diýlip, resmi beýanatda bellenilýär.
Şu ýylky baýrak eýelerine medallar we
diplomlar ilçihanalaryň ýa-da uniwersitetleriň üsti bilen öz ýurtlarynda
gowşurylar. Stokgolmda we Osloda däp bolup gelýän Nobel baýragynyň gowşurylyş dabaralary, şeýle hem Alfred
Nobeliň aradan çykan güni 10-njy dekabrda Stokgolm şäher häkimliginde guralýan Nobel
dabarasy bu ýyl dünýäde emele gelen çylşyrymly
ýagdaýlar sebäpli ýatyryldy. Mundan öň, 2020-nji ýylyň fiziologiýa we
lukmançylyk, fizika, himiýa, edebiýat we Parahatçylyk boýunça Nobel baýragynyň eýeleri
belli boldy.