Amerikanyň Milli basketbol ligasy NBA-da transfer möwsüminde öňki ýyllara garanyňda, juda köp ýyldyz oýunçy klubuny üýtgetdi. “Golden Steýt Warriorsyň” super ýyldyzy Kewin Durant “Bruklin Netsiň” hataryna goşuldy.
Sentýabr aýynda 31 ýaşyna gadam basjak Durant “Bruklin Nets” bilen 4 ýyllyk şertnama baglaşdy. “Bruklin Nets” Durantdan başga-da ýene 2 ýyldyz oýunçy bilenem şertnama gol çekişdi. “Boston Seltiks” toparynyň ýyldyzy Kaýr Irwing hem “bruklinli” boldy. 28 ýaşyndaky oýunçy täze topary bilen 141 million dollar möçberinde 4 ýyllyk şertnama baglaşdy. “Bruklin Netsiň” beýleki ýyldyzy-da DeAndre Jordon bolup, geçen möwsümi “Nýu Ýork Niksde” oýnapdy.* Taryhynda ilkinji gezek NBA-da çempionlyk gazanan kanada topary “Toronto Reptorsyň” super ýyldyzy, MVP saýlanan oýunçysy Kawhi Leonard “Los Anjeles Klipperse” geçdi.
Los Anjeles şäheriniň topary 28 ýaşyndaky oýunça 4 ýyl üçin 142 million dollar berer.* “Oklahoma Siti Tanderiň” ýyldyzy Rassel Westbruk hem toparyny çalyşdy. 30 ýaşyndaky Westbruk “Hýuston Rokets” toparyna transfer boldy. “Hýuston” kluby-da onuň ornuna “Oklahoma Siti Tandere” ýyldyz basketbolçysy Kris Poly hem-de toparyň draft etmek hukugyny berer.* “Nýu Orleans Pelikansyň” ýyldyz basketbolçysy Entoni Dewis super ýyldyz LeBron Jeýmsiň topardaşy bolýar. 26 ýaşly oýunçy “Los Anjeles Leýkers” bilen uzak möhletleýin ylalaşyk gazandy. “Leýkers” bu transfer üçin 3 oýunçysyny (Lonzo Ball, Brandon Ingram, Joş Hart) hem-de draft etmek hukugyny “Nýu Orleans Pelikans” klubuna bermeli bolar.* “Çarlotte Hornetsiň” ýyldyzy 29 ýaşyndaky Kemba Wolker “Boston Seltiks” toparynyň hataryna goşuldy. Şol sanda türkiýeli Enes Kanter hem “Boston Seltiks” bilen şertnama baglaşdy.* “Minnesota Timberwolwesiň” ýyldyz oýunçysy Jimmi Battler hem toparyny çalyşdy.
Ol “Maýami Hit” toparynyň düzümine goşuldy.* Paýtagtyň “Waşington Wizards” topary-da “Denwer Naggetsiň” ýyldyzy Isaiah Tomas bilen düzümini güýçlendirdi.