Lebabyň suwuklandyrylan gaz öndürmek boýunça önümçilik müdirliginiň işgärleri Naýypda we Bagajada gazy gaýtadan işleýän enjamlaryň işe girizilen gününden bäri Seýdiniň nebti gaýtadan işleýän zawodyna 1,5 million tonnadan gowrak uglewodorod kondensatyny iberdiler.
SNGIZ-de bu strategik çig maldan dünýä bazarlarynda islegli ýokary hilli açyk reňkli nebit önümleri çykarylýar.Gazy gaýtadan işleýän konweýeriň işe girizilmegi bilen Naýypda we Bagajada gazy gaýtadan işlemekden alynýan millionlarça tonna suwuklandyrylan gazyň aglaba bölegi daşary ýurtlara ugradylýar.
Naýyp, Gazlydepe, Kerwen, Bagaja, Izmail we beýleki ýataklardan alynýan tebigy gaz gije-gündiziň dowamynda awtomatlaşdyrylan enjamlarda gaýtadan işlenilýär.Düzümleýin diwersifikasiýa we ylmy tutumly tehnologiýalaryň esasynda tehniki taýdan döwrebaplaşdyrmak eksport mümkinçiligini ýokarlandyrmak jähtinden ýurdumyzyň nebit-gaz toplumyny ösdürmegiň esasy ugurlarynyň biridir.
Gazy gaýtadan işleýjiler bu strategik wezipeden ugur alyp, Italiýanyň Technofrigo kompaniýasynyň guran we 1998-nji ýylda işe girizen Naýypdaky gazy gaýtadan işleýän ilkinji enjamyny tehniki taýdan döwrebaplaşdyrmak boýunça çäreler toplumyny amala aşyrýarlar.
Eýýäm önümçilik prosessini täzelemek we kämilleşdirmek boýunça taslama işleriniň esasy bölegi ýerine ýetirildi.