Napoli wagtyndan öň Italiýanyň çempiony boldy. A seriýanyň 33-nji tapgyrynda myhmançylykda Udineze bilen 1:1 hasabynda deň oýnan Neapol şäheriniň kluby utuklarynyň sanyny 80-e ýetirip, ýaryşyň tamamlanmagyna 5 tapgyr galanda çempionlygyny kepillendirdi.
Şeýlelikde, Napoli iň ir çempion bolan topar hökmünde turniriň rekordyny täzeledi. Mundan başga-da, Luçano Spaletti hem toparyny A seriýada çempion eden iň ýaşy uly tälimçi hökmünde taryha girdi. Optanyň hasaplamalaryna görä, ol 64 ýaş 58 günlük wagtynda tälim berýän topary bilen çempionlyga mynasyp boldy.
Ýeri gelende bellesek, bu Napoliniň A seriýadaky üçünji çempionlygydyr. Napoli mundan ozal 33 ýyl mundan öň, düzüminde Diýego Maradona oýnaýarka çempion bolupdy.