25-nji iýulda Russiýa Ukrainanyň Odesa portuna raketaly hüjüm edenden soň, bugdaýyň bahasy birden ýokarlandy, Kreml zarbalaryň harby desgalary nyşana alandygyny we galla eksportyna täsir etmejekdigini öňe sürdi.
Kremliň metbugat sekretary Dmitriý Peskow 25-nji iýulda Odesa portundaky nasos stansiýasynyň golaýyna gonan iki sany "Kalibr" raketasynyň "diňe" harby infrastrukturany nyşana alandygyny we 22-nji iýulda Stambulda Russiýa, Ukraina, Birleşen Milletler Guramasy we Türkiýe arasynda gazanylan gallany eksport etmek baradaky şertnama bilen baglanyşykly däldigini aýtdy.
"Bu [gallanyň] ýüklenip başlamagyna täsir edip bilmez we täsir etmez" - diýip, Peskow žurnalistlere aýtdy.
Şeýle-de bolsa, bugdaýyň bahasy Çikago Söwda biržasynda 25-nji iýulda tas 4% ýokarlanyp, bir buşeliň nyrhyny 7.86 dollara ýetirdi we şertnama gol çekilenden soň elden berlen pozisiýalaryň uly bölegini yzyna gaýdyp alyndy.
Ukraina dünýäde bugdaýy, mekgejöweni we günebakar ýagyny iň köp eksport edýän ýurtlaryň biri, emma Russiýanyň bu ýurda çozmagy we Ukrainanyň deňiz portlarynyň gabawa düşmegi ýük daşalmagyny bes etdi.
Bu, azyk önümleriniň global bahasynyň ýokarlanmagyna sebäp boldy, garyp ýurtlarda millionlarça adamy açlyk howpuna sezewar etdi we sosial tolgunyşyk gorkusyny döretdi.
Ukrainanyň Gara deňzindäki üç portuny galla eksporty üçin açmak baradaky şertnama 120 gün dowam eder we aýda 5 million tonna eksport edilmegi maksat edinýär.
Moskwanyň Ukraina çozmagyndan bäri söweşler gowşamady, rus goşunlary demirgazykda, günortada we gündogarda birnäçe ýeri oka tutdy, rus goşunynyň işgär ýetmezçiliginden başga-da, söweşde zeper ýeten ýüzlerçe enjamyny çalyşmakda ýa-da abatlamakda kynçylyk çekýändigi ýüze çykdy.
Ukrainanyň goranmak ministri Oleksiý Reznikow 25-nji iýulda ukrain güýçleriniň ABŞ-nyň üpjün eden “High Mobility Artillery Rocket Systems” (HIMARS) raketa ulgamlaryny ulanyp, 50 sany rus ýarag ammaryny ýok edendigini aýtdy.
Reznikow telewideniýede beren beýanatynda "Bu olaryň (rus) maddy-tehniki zynjyrlaryny kesýär we olar işjeň söweş alyp barmak hem-de ýaragly güýçlerimiziň üstünden top oklaryny ýagdyrmak ukybyny ýitirýär" - diýdi.
Reznikowyň aýdanlaryny garaşsyz tassyklap bolmady.
Russiýanyň Goranmak ministrligi hem öz gezeginde 25-nji iýulda öz güýçleriniň Ukrainanyň Hmelnytskiý sebitindäki Bohdanowtsi şäherinde HIMARS ulgamy üçin ok ammaryny ýok edendigini aýtdy.
Ne ukrain, ne-de rus tarapynyň bu aýdanlaryny garaşsyz tassyklap bolmady.
Russiýa ozal hem Günbatar tarapyndan Ukraina berlen HIMARS ulgamlarynyň birnäçesini ýok edendigini aýdypdy. Kiýew muny ret edipdi.
Reznikow 25-nji iýulda Germaniýadan ilkinji üç sany "Cheetah" uçar raketa ulgamynyň eýýäm Ukraina gowşandygyny aýtdy.
Britaniýanyň Goranmak ministrligi Ukrainanyň gündogarynda we urşuň başynda ruslaryň eline düşen Herson sebitinde "netijesiz" söweşiň alnyp barylýandygyny 25-nji iýulda gündelik habar býulleteninde mälim etdi.
Býulletende kadrlar resurslarynyň ujypsyzlygy rus serkerdelerine gündogarda hüjümi güýçlendirmegi ýa-da günbatarda goranyşa bat bermegi kynlaşdyrýar diýilýär.
Şeýle hem, 18-nji iýulda britan aňtaw gullugynyň Russiýanyň Belgorod sebtinde, Ukrainanyň serhedinden 10 km uzaklykda ýerleşýän Barwinok şäheriniň golaýynda rus harby ulaglaryny bejermek üçin desgany anyklandygy habar berildi.
"Esasan söweş tanklary, sowutly ulaglar we umumy goldaw awtoulaglary ýaly azyndan 300 sany zeper ýeten ulag bardy" - diýlip, maglumatda aýdylýar.
Ukrainanyň Ýaragly Güýçleriniň Baş ştabynyň aýtmagyna görä, rus goşunlary 24-nji iýulda Donetskden 50 km demirgazyk-gündogarda ýerleşýän Wuhlehirskdäki elektrik stansiýasyna gözegçilik etmek boýunça synanyşygyny dowam etdirýärler. Zawod, Russiýanyň güýçleriniň ele almak isleýän ikinji uly we strategiki infrastruktura maksadydyr. Maglumata görä, zawody ele geçirmek üçin ýene bir şowsuz synanyşykdan soň rus güýçleri yza çekilipdir.
Baş ştab, ukrain güýçleriniň 22-nji iýulda hem zawoda gözegçilik ugrundaky ozalky hüjümiň öňüni alandygyny aýtdy.
Bu aralykda Russiýanyň Derňew komitetiniň başlygy Russiýanyň Ukrainanyň ýaragly güýçleriniň 92 agzasyny adamzada garşy jenaýat jogapkärçiligine çekendigini aýtdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.