Stoluň üstünde oýnalýan nusgawy Monopoly oýunlaryna esaslanýan meşhur Monopoly GO mobil oýny häzirki wagtda döredijilerine her günde 5 million dollar girdeji getirýär diýip, igromania.ru saýty habar berýär.
AppMagic analitika kompaniýasynyň maglumatlaryna laýyklykda, 2023-nji ýylyň dekabrynda bu oýun öz girdejisini dört esse artdyrdy we onuň gündelik girdejisi ortaça 4 million dollar töweregi möçbere deň boldy.
Monopoly GO oýnunyň döredileninden bäri bir ýylda gazanan umumy girdejisi 1 milliard dollardan geçdi. Bu bolsa oýnuň ägirt uly meşhurlygy sebäpli mümkin boldy: oýun diňe Google Play internet dükanyndan 50 milliondan gowrak gezek ýüklenip alyndy.
Girdejisi boýunça Monopoly GO mobil oýunlar bazarynyň PUBG Mobile, Genshin Impact, Kings of Honor, Roblox hem-de Candy Crush Saga ýaly oýunlaryndan öňe saýlanmagy başardy. Şeýle-de bolsa, oýunçylar oýnuň içindäki mazmuny satyn almazdan, ösüşiň gaty haýal bolýandygyny belleýärler. Şeýle hem, olar dürli oýun wakalaryna garaşmak üçin köp wagtyň sarp edilmegini halamaýarlar.