Golaýda Arkadag şäheriniň Taryhy we ülkäni öwreniş muzeýinde Türkmenistanyň Magtymguly adyndaky Ýaşlar guramasynyň Arkadag şäheriniň Geňeşi bilen bilelikde guralan Mirasym mertebäm atly maslahat duşuşyk geçirildi.
Maslahat duşuşygyna Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň guramaçylyk bölüminiň müdiri Umyda Kakaýewa, Türkmenistanyň Demokratik partiýasynyň Arkadag şäheriniň komitetiniň hünärmeni Akgözel Annamämmedowa, Türkmenistanyň Kärdeşler arkalaşyklarynyň Arkadag şäheriniň birleşmesiniň hünärmeni Jennet Geldiýewa, Arkadag şäheriniň Taryhy we ülkäni öwreniş muzeýiniň hünärmeni Akgül Gurbanmämmedowa gatnaşdylar. Maslahat duşuşygy Arkadag teleýaýlymy tarapyndan ýazgy edildi.
Duşuşykda Türkmenistanda amala aşyrylýan maksatnamalaýyn işleriň netijesinde, ylym, bilim, medeniýet, syýahatçylyk we sport ulgamlarynyň gazanan üstünlikleri, türkmen halkynyň medeni mirasyny goramak we geljekki nesillere ýetirmek, milli ruhy-medeni gymmatlyklary, däp-dessurlary dikeltmek, ilatyň bilimini we umumy medeniýetini ýokarlandyryp, dünýä standartlaryna ýetirmek babatda alnyp barylýan işler dogrusynda gürrüňler edildi.