Italiýanyň çempionaty “Serie A”-nyň 14-nji tapgyrynda sanawyň lideri “Milan” soňky minutlarda ýeňiş gazandy. Öz meýdançasynda “Lasiony” kabul eden “Milan” 10-njy minutda Rebiçiň, 17-nji minutda-da Hakan Çalhanoglunyň penalti goly bilen 20 öňe saýlandy. 27-nji minutda Immobileniň uran penaltisinden soň yzyna gaýdan topy Luiz Alberto derwezä gönükdirdi. 2-nji ýarymda-da, has takygy, 59-njy minutda Immobile hasaby deňledi.
Oýnuň 90+2-nji minutynda-da Hakan Çalhanoglunyň pasyndan soň, Teo Hernandes “Milana” ýeňiş getiren goly derwezä girizdi. Şeýlelikde, 14-nji oýnunda 10-njy ýeňşini gazanan “Milan” ýeňlişsiz liderligini dowam etdirmegi başardy.
Olar häzirki wagtda Ýewropanyň öňdebaryjy 5 çempionatynda ýeňlişsiz barýan ýeke-täk topardyr. “Milan” “Serie A”-da 26 oýundan bäri ýeňilmän gelýär. Şeýle-de “Milan” yzly-yzyna 16 oýundan azyndan 2 gol geçirip, bu ugurda 12-nji tapgyrda “Torinonyň” 72 ýyllyk rekordyny täzeläpdi. “Torino” 1948-nji ýylda yzly-yzyna 13 oýundan azyndan 2 gol geçiripdi. “Milan” topary ýene-de 3 oýunda azyndan 2 gol geçirse, onda olar bu ugurda Ýewropanyň TOP – 5 çempionatynyň çäginde “Barselonanyň” (18 oýun) hem 72 ýyllyk rekordyna täzelär.
“INTER” HEM ÝARYŞDAN GALANOK
“Serie A”-da 14-nji tapgyrda “Inter” myhmançylykda “Weronany” Lautara Martines hem-de Şkrinieriň gollary bilen 21 ýeňdi. “Napoli” 2 ýeňlişden soň, “Torino” bilen 1-1 deňme-deň oýnady. “Roma” hem öz meýdançasynda “Kaliariden” 3-2 üstün çykdy (Weretu 11, Jeko 71, Mançini 77 Žoao Pedro 59, 90+1 p). Öňdäki orunlara ymtylýan “Sassuolo” hem myhmançylykda 3-2 hasap bilen “Sampdoriýanyň” ýeňlişe sezewar etdi.
14-nji tapgyrdan soň, “Milan” 34 utuk bilen 1-nji, ondan 1 utugy az şäheriň başga bir kluby “Inter” 2-nji ýerde barýar. 3-nji basgançakdaky “Romanyň” 27 utugy bar.
Iň köp pökgi geçirenleriň sanawynda Kristiano Ronaldo 12 gol bilen 1-nji orunda barýar. 2-3-nji orunlardaky Romelu Lukakunyň 11, Zlatan Ibrahimowiçiň 10 goly bar.
Çempionatda nobatdaky duşuşyklar 3-nji ýanwarda oýnalar.
The post “Milan” ýeňlişsiz ýeke-täk topar appeared first on Zaman Türkmenistan.