UEFA Çempionlar ligasynyň täze möwsüminiň ilkinji duşuşyklaryna
düýn badalga berildi. Täze möwsümiň ilkinji goluny “G” toparçada 46-njy
minutda Ýuwentusyň ispaniýaly hüjümçisi Alwara Morata Dinamo Kiýewiň derwezesinden girizdi. Ol 84-nji
minutda-da tapawutlanyp, toparynyň 2-0 ýeňiş gazanmagyna uly goşant goşdy.
Dinamo Kiýewiň rumyniýaly tälimçisi Mirçea Luçesku Çempionlar ligasynyň iň ýaşuly tälimçisi boldy. 75 ýaşly
hünärmen bu ugurda germaniýaly Ýupp Haýnkessiň (72 ýaş) rekordyny täzeledi. Şeýle-de Ýuwentusyň tälimçisi Andrea Pirlo hem Çempionlar ligasyndaky tälimçi hökmünde ilkinji duşuşygyny
özüniň ilkinji tälimçisi, 1996-njy ýylda 15 ýaşyndaka Breşiýanyň esasy düzüminde oýnadan Luçeskunyň garşysyna geçirendigi aýratyn bellärliklidir.
Toparçanyň beýleki duşuşygynda Barselona topary
25 ýyldan soň, bu ýaryşa gatnaşan wenger kluby Ferenswaroşy 5-1 ýeňdi. Oýunda Barselonanyň ilkinji goluny geçiren Lionel Messi Çempionlar ligasynda bassyr 16-njy möwsümde-de
tapawutlanyp, bu ugurda Raýan Giggsiň rekordyny gaýtalady. Şeýle-de Lionel Messi Çempionlar ligasynyň çäginde 36-njy toparyň derwezesinden gol geçirip, bu
ugurda öz rekordyny ösdürdi. Galyberse-de bu gol Lionel Messiniň toparçalardaky 69-njy goly bolup, ol iň ýokary
görkezijidir.
“E” toparçadaky 2
duşuşyk hem deňlikde gutaryp, Çelsi-Sewilýa oýnunda hasap açylmady. Liganyň 2 debýutanty Renn bilen Krasnodaryň arasyndaky oýun hem 1-1 hasabynda
tamamlandy.
“F” toparçada milli
çempionata şowsuz başlan Lasio öz
meýdançasynda Borussiýa
Dortmunddan 3-1
üstün çykdy. Immobile
(6), Hits (23 ö.d.), Akpa Akpronyň (76) gollary bilen ýeňiş
gazanan Lasionyň derwezesinden ýeke-täk pökgini
71-nji minutda norwegiýaly hüjümçi Hollann girizdi. Bu onuň Çempionlar ligasyndaky 9-njy oýnunda 11-nji goludyr. Zenit
bolsa öz meýdançasynda garaşylmadyk ýagdaýda Klub Brýuggeden 2-1 asgyn geldi.
“H” toparçada Mançester Ýunaýted topary PSŽ-ni
myhmançylykda ýene bir ýolsa soňky minutlarda geçiren goly bilen 2-1 hasabynda
ýeňmegi başardy. Duşuşykdaky 3 goly-da ýunaýtedli futbolçylar geçirdi. 23-nji minutda penaltiden Fernandeş hasaby açdy. 55-nji minutda Marsial ýalňyşlyk bilen topy öz derwezesinden
geçireninden soň, hasap deňlendi. Oýnuň tamamlanmagyna 3 minut galanda-da Reşford mankunianlara ýeňiş getirdi. Toparçadaky beýleki duşuşykda Leipsig öz meýdançasynda Anjelinýonyň gollary bilen liganyň debýutanty Istanbul BŞ toparyny 2-0 utdy.
Çempionlar ligasynda şu gün “A”, “B”, “C”
hem-de “D” toparçalaryndaky ilkinji duşuşyklar oýnalar.
“E”: Çelsi Sewilýa: 0-0
“E”: Renn Krasnodar: 1-1 (Žirassi 56 p Ramires 59)
“F”: Lasio Borussiýa D: 3-1 (Immobile 6, Hits 23 ö.d., Akpa Akpro 76 Hollann 71)
“F”: Zenit Klub Brýugge: 1-2 (Horwat 74 ö.d. Dennis 63, De
Ketelaere 90+3)
“G”: Dinamo K Ýuwentus: 0-2 (Morata 46, 84)
“G”: Barselona Ferenswaroş: 5-1 (Messi 27 p, Fati 42, Koutinio 52, Pedri 82, Dembele 89 Haratin 70 p)
“H”: PSŽ M. Ýunaýted: 1-2 (Marsial 55 ö.d. Fernandeş 23 p, Reşford 87)
“H” Leipsig Istanbul BŞ: 2-0 (Anjelinýo 16, 20)