Kopa Amerika çempionatynda ilkinji ýarym finalçy belli boldy.Soňky çempion Argentinanyň ýygyndysy kynlyk bilenem bolsa adyny iň gowy 4 toparyň hataryna goşmagy başardy.Hýuston şäherinde geçirilen duşuşykda Argentinanyň ýygyndysy Ekwadoryň ýygyndysy bilen duşuşdy.
Oýnuň 35-nji minutynda bu gezek Lautara Martines däl-de, goragçy Lisandro Martines tapawutlandy.Ekwadorlylar bu gola oýnuň soňky minutlarynda jogap berdi. 90+2-nji minutda Hose Rodriges hasaby deňlemegi başardy.
Oýundan soň goşmaça wagt berilmezden gönümel penalti urgularyna geçildi.Penalti urgularynda-da argentinleriň ilkinji urgusyny uran super ýyldyz Lionel Messi topy derwezä salyp bilmedi.Onuň urgusy sütünden yzyna gaýtdy.
Netijede, Argentinadan Alwaresiň, MakAllisteriň, Montieliň hem-de Otamendiniň urgulary dürs bolup, Ekwadordanam 1-2-nji urgulary uran Mena bilen Mindanyň penaltilerini-de argentinaly derwezeçi, penalti saklamakda ökde hasaplanýan Emiliano Martines sowmagyň hötdesinden geldi.
Ekwadordan Ýeboanyň hem-de Hordi Kaisedonyň urgulary olara ýeterlik bolmady.Penaltilerde 4-2 öňe saýlanan Argentinanyň ýygyndysy ýarym finala çykmagy başardy.Tangoçylar 10-njy iýulda ýarym finalda Wenesuelanyň ýa-da Kanadanyň ýygyndysy bilen duşuşar.
Bu duşuşykdan soň Ekwadoryň tälimçisi Feliks Sançesiň şertnamasy ýatyryldy. Ispaniýaly hünärmen 2023-nji ýylda 4 ýyllyk şertnama baglaşypdy. Ekwadoryň ýygyndysy Wenesuelanyň ýygyndysy bilen Kopa Amerikada çempionlyk gazanyp bilmedik 2 toparyň biridir.