Şu gün 24-nji iýulda wideokonferensiýa görnüşinde Merkezi Aziýa + Ýaponiýa Dialogynyň ýokary wezipeli şahslarynyň mejlisi geçirildi. Mejlise Merkezi Aziýa ýurtlarynyň we Ýaponiýanyň daşary syýasy edaralarynyň ýolbaşçylarynyň orunbasarlary gatnaşdy. Mejlisde Türkmenistana Daşary işler ministriniň orunbasary Ahmet Gurbanow wekilçilik etdi.
Taraplar şu ýylyň 9-10-njy awgusty aralygynda Astana şäherinde geçiriljek Merkezi Aziýa + Ýaponiýa Dialogynyň Sammitine taýýarlyk bilen baglanyşykly meseleleri ara alyp maslahatlaşdylar. Duşuşykda Sammitiň we Işewürler forumynyň maksatnamalary, gün tertibi gözden geçirildi, şeýle hem Sammitiň jemleýji resminamasynyň taslamasy ara alnyp maslahatlaşyldy.
Şeýle hem duşuşygyň barşynda taraplar Merkezi Aziýa ýurtlarynyň we Ýaponiýanyň arasyndaky syýasy-diplomatik, söwda-ykdysady we medeni-ynsanperwer ugurlar boýunça hyzmatdaşlygyň derwaýys meseleleri barada pikir alyşdylar. Şunuň bilen baglylykda A.Gurbanow türkmen tarapynyň Dialogyň çäginde hyzmatdaşlygy ösdürmäge gyzyklanma bildirýändigini belledi.