“Türkmenistan Beýik Ýüpek ýolunyň ýüregi” ýylynda hormatly Prezidentimiziň taýsyz tagallalary netijesinde, Beýik Ýüpek ýoly täze görnüşde dikeldilýär.Muny halk hojalygynyň ähli pudaklary bilen bir hatarda medeni-ynsanperwer ugurda-da görmek bolýar.
Golaýda Täjigistan Respublikasynda Türkmenistanyň Medeniýet günleri geçirildi.Oňa gatnaşan ýurdumyzyň medeniýet işgärleri demir ýol arkaly dostlukly ýurda bardylar.Ýolagçy düzümi görnüşindäki häzirki zaman kerweni Beýik Ýüpek ýolunyň Gündogara tarap ugruny täzeden dikeldip, Mary we Lebap welaýatlarynyň çäklerinden geçip, Özbegistanyň üsti bilen Täjigistana bardy. Özbegistanyň Termez şäherinde özbek doganlarymyz türkmen wekiliýetini uly şatlyk bilen garşy aldy.
Demir ýol menzilinde dabara geçirilip, onda iki ýurduň halklarynyň medeni gymmatlyklary görkezildi.Täjigistanda geçirilen Türkmenistanyň Medeniýet günleri iki halkyň arasynda dostluk gatnaşyklarynyň berkidilmegine, dürli ugurlarda hyzmatdaşlygy has-da ösdürmäge möhüm goşant boldy.
Türkmenistanyň Täjigistan Respublikasyndaky Medeniýet günleriniň maksatnamasynyň çäklerinde Duşenbede guralan köp sanly çärelerden başga-da, ýurdumyzyň wekiliýeti türkmenleriň kowçum bolup ýaşaýan Dusti şäherçesine baryp gördüler.Medeni çäreleriň hatarynda täjik doganlarymyza hormatly Prezidentimiziň “Türkmenistan Beýik Ýüpek ýolunyň ýüregi” atly kitabyny tanyşdyrmak maksady bilen, geçirilen tanyşdyrylyş dabarasy hem uly gyzyklanma döretdi.Soňky ýyllarda ynsanperwer ulgamda hem türkmen-täjik hyzmatdaşlygy işjeň häsiýete eýe boldy.
Iki ýurduň döredijilik işgärleri iki döwletiň şanly senelerine bagyşlanan çäreleriň geçirilmegine gatnaşýarlar, aýdym-saz toparlarynyň çykyşlary, çeper sergiler guralýar.Hormatly Prezidentimiziň başyny başlan bu medeni çäresi iki halkyň däbe öwrülen hoşniýetli goňşuçylyk gatnaşyklaryny berkitmäge gönükdirilendir, munuň özi sebitde parahatçylygy we durnuklylygy saklamaga ýardam edýär.
Döwlet ORAZMYRADOW,Türkmen döwlet ulag we aragatnaşykinstitutynyň mugallymy.