ABŞ-nyň öňki wise-prezidenti Maýk Pens 2024-nji ýylyň noýabr aýynda geçiriljek indiki prezident saýlawlaryna gatnaşmak üçin resminamalaryny tabşyrdy. Degişli maglumatlar ABŞ-nyň Federal saýlaw komissiýasynyň web sahypasynda mälim edildi.
Maýk Pens Respublikan partiýasyna wekilçilik edýär. Ol respublikaçylaryň adyndan prezidentlige dalaşgär görkezilmegini gazanmak isleýär. Şeýle-de, muňa ABŞ-nyň öňki prezidenti Donald Tramp, Florida ştatynyň gubernatory Ron Desantis, ABŞ-nyň BMG-däki öňki ilçisi Nikki Heýli, Günorta Karolina ştatynyň senatory Tim Skott we beýleki syýasatçylar dalaş ederler.
NBC teleýaýlymy ozal Pensiň basym ýurduň prezident saýlawlarynyň öňýanyndaky ýaryşyna resmi taýdan girmek isleýändigini habar beripdi.
ABŞ-nyň indiki prezident saýlawy 2024-nji ýylyň noýabr aýynda geçiriler. 25-nji aprelde ABŞ-nyň häzirki Prezidenti, demokrat Jozef Baýden ýokary hökümet wezipesine gaýtadan saýlanylmaga dalaş etjekdigini aýdypdy.