Mary welaýatynyň käbir dermanhanalarynda möhleti geçen dermanlaryň satylmagy ilat arasynda alada döredýär. Bu aralykda, uly möçberlerde ýazylan jerimeleriň yz ýany, sebitde ygtyýarnamasyz derman satýan hojalyklar söwdany bes etdi. Bular barada Azatlyk Radiosynyň habarçysy 5-nji iýunda sebitden maglumat berdi.
Garagum etrabynyň bir ýaşaýjysy golaýda özüniň näsag çagasyna dermanhanadan satyn alan sanjymynyň möhletiniň geçendigine giç düşünendigini gürrüň berýär.
“Dermany kabul edenden soňra, çagamyň gyzgyny galyp, tas 40 gradusa ýetdi. Lukmanlar ilkibaşda dermana şübhe bildirmediler, ýöne soňra, dermanyň ýaramlylyk möhletiniň üç aý ozal gutarandygyny gördüler” diýip, bir ene gürrüň berýär.
Ol lukmanyň dermannamasy esasynda “Seftriakson” dermanynyň sanjym görnüşini satyn alyp, hassahanalaryň birinde şepagat uýalaryna sanjym etdirdipdir.
“Lukmanlar sanjym eden şepagat uýasyna düşündiriş ýazdyrdylar, bizden bu dermany haýsy dermanhanadan satyn alandygymyzy anykladylar” diýip, maryly ene gürrüň berýär.
“Her niçik-de bolsa, sanjymyň görkezen ters täsiri has howply ýagdaýlara ýol açmady” diýip, ol sözüniň üstüni ýetirýär.
Garagumly ene özüniň hiç haçan dermanhanalarda möhleti geçen dermanlaryň satylyp bilinjekdigini göz öňüne-de getirip bilmändigini, şonuň üçin ynam bildirendigini aýdýar. Üstesine, şepagat uýasynyň sanjymyň ýaramlylyk möhletiniň geçip-geçmändigini anyklar öýdendigini aýdýar.
Ýöne ne dermanhana, ne-de şepagat uýasy garagumly ýaşaýjynyň ynamyny ödäp bilýär.
“Lukmanlar bize indikide dermanhanalardan derman satyn alanymyzda, onuň ýaramlylyk möhletini barlap, satyn almagy maslahat berdiler. Biz dermanhanalarda möhleti geçen dermanlaryň satylyp bilinýändigini nireden bilmeli!? Dermanhanalar barlagdan geçirilýändir öýtdük, üstesine şepagat uýalary hem dermanlaryň ýaramlylyk möhletini barlaýmaly!” diýip, garagumly ene gürrüň berýär.
Azatlyk Radiosynyň habarçylary geçen ýylyň ahyrlarynda, Täze ýyl baýramçylygynyň bosagasynda, bu sebitde ygtyýarnamasyz derman satýan hojalyklaryň häkimiýetler tarapyndan nyşana alynýandygyny habar berdiler.
Özleriniň diňe lukman dermannamasyny talap etmeýän “analgin, parasetamol” ýaly dermanlaryň söwdasy bilen meşgullanýandyklaryny aýdan hojalyklar şonda bu söwdany öz ýaşaýan sebitlerinde dermanhanalaryň bolmazlygy we gyssagly kömek zerur bolan halatynda goňşy-golama, öz ýaşaýan iline, hem ýardamçy bolmak, hem gazanç etmek islegleri bilen düşündiripdiler.
Ýöne habarçylarymyz häzirki wagtda etraplarda şeýle hojalyklaryň galmandygyny, ygtyýarnamasyz derman satýan hojalyklara uly möçberlerde jerimeleriň ýazylyp, olaryň öz işlerini bes edendiklerini aýdýarlar.
Çagasy möhleti geçenden dermandan aman galan garagumly ene ýaramlylyk möhleti geçen dermanlaryň söwdasy bilen meşgullanýan ygtyýarnamaly dermanhanalar bilen hojalyklarda derman satan ygtyýarnamasyz derman söwdagärlerini deňeşdirýär.
“Hatda öz hojalygynda derman satýan ygtyýarnamasyz derman söwdagärleri hem, dermanhanalar ýaly, ýaramlylyk möhleti geçen dermanlary satmazdylar” diýip, garagumly ene gürrüň berýär.
Azatlyk Radiosynyň habarçylary sebitiň dermanhanalarynda möhleti geçen dermanlaryň satylmagynyň ilatyň jan-saglygyna howp abandyryp, zyýan ýetirýändigini habar berýärler.
Şeýle-de, ýerli ýaşaýjylar ilat arasynda dowam edýän ykdysady kynçylyklaryň hem-de işsizligiň maşgalalary keselçilik ýagdaýynda arzan dermanlary satyn almaga iterýändigini aýdýarlar.
Azatlyk Radiosy bu ýagdaýlar boýunça Türkmenistanyň Saglygy goraýyş we derman senagaty ministrliginden teswir alyp bilmedi.
Ministrligiň Derman serişdelerini hasaba alyş we olaryň hiline döwlet gözegçiligi merkezi derman serişdeleriniň bellige alynmagyna gözegçilik edýär. Ýurtda hususy we döwlet eýeçiligindäki dermanhanalar hereket edýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.