Mary şäheriniň 2-nji sport mekdebinde küşt boýunça 8, 12, 16 ýaşly oglan-gyzlaryň arasynda welaýatyň birinjiligi geçirildi. Bäş günläp dowam eden ýaryşa ýaş küştçüleriň 150-den gowragy gatnaşdy. Zehinli küştçüler her bir göçümi dürs we dogry ýerine ýetirip, özleriniň saýlap alan sport görnüşi boýunça barha kämilleşýändiklerini görkezmegi başardylar. Bu barada Türkmenistan gazeti ýazýar.
Şeýlelikde, 8 ýaşly oglanlaryň arasynda Mary şäheriniň 1-nji sport mekdebiniň küştçüleri Baýgeldi Bazarow, Emirhan Batyrow, Baýramaly etrabynyň 1-nji sport mekdebiniň türgeni Kemal Mergenow, gyzlaryň arasynda Mary şäheriniň 1-nji sport mekdebiniň zehinli küştçüleri Mahym Ezizowa, Käbe Baýramalyýewa, Käbe Muhammetberdiýewa dagy öňdäki orunlara mynasyp boldular.
12 ýaşly oglanlaryň arasynda geçirilen ýaryşda Mary şäheriniň 1-nji sport mekdebiniň ýaş küştçüleri Alyhan Batyrow, Rauf Ýusupow, Baýramaly etrabynyň 1-nji sport mekdebiniň türgeni Kerwen Merjenow baýrakly orunlary eýelediler. 12 ýaşly gyzlaryň arasynda Mary şäheriniň 2-nji sport mekdebiniň küştçi gyzlary Ejegyz Amanowa, Gözel Aşyrmyradowa, Baýramaly etrabynyň 1-nji sport mekdebiniň küştçüsi Mähriban Gurbannazarowa dagy ýeňiji bolmagy başardy.
16 ýaşly oglanlaryň arasynda geçirilen ýaryşda Mary şäheriniň 2-nji sport mekdebiniň küştçüleri Ysmaýyl Maksadow, Ýazgeldi Berdinyýazow, Baýramaly etrabynyň 1-nji sport mekdebiniň küştçüsi Serdar Käbehanow garşydaşlaryndan görnetin tapawutlanyp, ýeňiji boldular. 16 ýaşly gyzlaryň arasynda Mary şäheriniň 1-nji sport mekdebiniň türgenleri Selbi Hemraýewa, Jennet Ýalkanowa, Türkmengala etrabynyň türgeni Bägül Ezizowa dagy ýaryşy ýeňiş bilen tamamlady.
Welaýatyň birinjiligi ugrunda geçirilen ýaryşda ýeňiji bolan ýaş küştçülere Kärdeşler arkalaşyklarynyň Mary welaýat birleşmesiniň taýýarlan sowgatlary we Mary welaýat sport we ýaşlar syýasaty Baş müdirliginiň Hormat hatlary gowşuryldy.