Moto GP boýunça möwsümiň 15-nji bäsleşigi Ýaponiýada geçirildi. Ýagyşly howada bolup geçen bäsleşikde “Ducati” toparynyň italýan sürüjisi Andrea Dowizioso ýeňiş gazandy.Motegi şäherindäki “Twin Ring” trassasynda geçirilen ýaryşa 9-njy hatardan başlan Dowizioso 24 aýlawy 47 minut 14,236 sekuntda tamamlady.
Ol şu ýylky 5-nji, karýerasyndaky 9-njy ýeňşini gazandy.Ondan 0,249 sekunt yza galan sanawyň lideri, ispaniýaly Mark Markes (“Repsol Honda”) 2-nji hem-de “OCTO Pramac” toparynyň italýan sürüjisi Danilo Petruççi 3-nji ýeri eýeledi.
Ilkinji hatardan ýaryşa goşulan “Yamaha” toparynyň fransiýaly piloty Ýohann Zarko 8-nji orna mynasyp boldy.Bu ýaryşdan soň, möwsümiň tamamlanmagyna 4 bäsleşik galanda, çempionlyk ugrundaky göreş hasam çekeleşikli ýagdaýda öwrüldi. Ýaponiýa “Gran Prisiniň” ýeňijisi Dowizioso öňdebaryjy Markes bilen arasyndaky utuk aratapawudyny 11-e düşürdi.
Häzirki wagtda Markesiň 244, Dowiziosonyň 233, 3-nji basgançakdaky Mawerik Winýalesiň-de 203 utugy bar.Möwsümiň 16-njy ýaryşy 22-nji oktýabrda, ýagny ertir Awstraliýada geçiriler.