Mançester Siti Angliýanyň premýer-ligasynyň 33-nji tapgyrynda Arsenaly uly hasap bilen ýeňdi. Ettihad stadionynda geçirilen oýun 4:1 hasabynda şäherlileriň peýdasyna tamamlandy.
Duşuşykda Mançester Sitiniň düzüminde Kewin De Bruýne (7-nji we 54-nji minutlar), Jon Stounz (45+1) we Erling Holland (90+5) tapawutlandy. Arsenalyň ýeke-täk jogap topy bolsa Rob Holding (86) tarapyndan geçirildi.
Şeýlelikde, Mançester Siti ähli ýaryşlardaky ýeňlişsiz oýunlarynyň seriýasyny 17 duşuşyga ýetirdi. Häzirki wagtda Pep Gwardiolanyň şägirtleri bir wagtyň özünde ÝÇL-de, APL-da we Angliýanyň Kubogynda hem kubok üçin göreş alyp barýarlar.
Ýeňlişe garamazdan, Arsenal 33 oýunda toplanan 75 utuk bilen APL-yň turnir tablisasynda liderlik edýär. Ikinji ýerdäki Mançester Sitiniň hasabynda bolsa 31 oýunda gazanylan 73 utuk bar.
Indiki tapgyryň oýnunda Arsenal 2-nji maý güni Çelsi bilen duşuşar. Öz gezeginde, şu tapgyrda öýünde Brentforddan 2:0 hasabynda ýeňlen Çelsiniň indiki möwsümde ÝÇL-e gatnaşmaga hukuk berýän orunlardan resmi ýagdaýda el üzendigini bellemek gerek.
Mançester Siti bolsa 30-njy aprelde myhmançylykda Fulhem bilen güýç synanyşar.Eger-de Mançester Siti şol oýunda ýeňiş gazansa, topçulary yzda galdyryp, turnir tablisasynyň birinji basgançagyna geçer.