Režissýory: Ol Parker; Keşplerde: Kristine Baranski, Piers Brosnan, Dominik Kuper, Kolin Firt, Endi Garsiýa, Lili Jeýms, Amanda Saýfred, Stellan Skarsgard, Juli Wolters, Çer, Meril Strip; Prodýuserleri: Judi Kreýmer, Gari Goetzman; Ssenariçi: Ol Parker; Kompozitory: Enn Dudli; Öndüriji: “Playtone”, “Littlestar Productions”, “Legendary Entertainment”; Paýlaýjy: “Universal Pictures”; Dowamlylygy: 114 minut; Görnüşi: sazly, romantik, komediýa; Ýurdy: ABŞ, Birleşen Şalyk; Dili: iňlisçe; Býujeti: 75 million $.
Iňlis dramaturgy Katerin Jonsonyň adybir pýesasy esasynda ilkinjisi mundan 10 ýyl ozal ekranlaşdyrylan “Mamma Mia!” filminiň 2-njisi halk köpçüliginiň dykgatyna ýetirildi. “Mamma Mia!Ine-de, täzeden başlaýarys” atly ikinji filmi “Imagine Me & You” (2005) hem-de “Now Is Good” (2012) kinolary bilen adygan iňlis režissýory Ol Parker surata düşürdi.
Sazly, romantik we komediýa görnüşli kinonyň ssenarisini-de režissýoryň özi ýazdy.Filmde Golliwudyň meşhur artistlerinden Kristine Baranski, Piers Brosnan, Dominik Kuper, Kolin Firt, Endi Garsiýa, Lili Jeýms, Amanda Saýfred, Stellan Skarsgard, Juli Wolters, Çer, Meril Strip dagy dürli keşpleri janlandyrdy.
Olaryň käbirleri 1-nji filmde-de surata düşüpdi.Horwatiýada we Angliýada ekranlaşdyrylan kinoda meşhur şwed aýdym-saz topary ABBA-nyň aýdymdyr sazlaryndan peýdalanyldy.Filmde onuň gahrymanlarynyň geçmişi, ýaşlyk ýyllary, birek-birek bilen tanyşyşlary barada gürrüň berilýär. 75 million dollar býujetli kino 115 million dollardan köp girdeji toplady. 52 million dollara ekranlaşdyrylan 1-nji film prokatdan 615 million dollarlyk girdeji gazanypdy.