Moto GP boýunça ýylyň 18-nji bäsleşigi Malaýziýanyň Sepang şäherinde geçirildi. Şäheriň adyny göterýän 5,5 kilometrlik trassada geçirilen 20 aýlawy “Monster Energy Yamaha” toparynyň ispan sürüjisi Mawetrik Winýales birinji bolup tamamlady.
Onuň görkezen netijesi 40 minut 14,632-ä deň boldy.Bu onuň şu möwsümdäki 2-nji, karýerasy boýunça-da 7-nji ýeňşidir. Ýaryşda ýeňijiden 3 sekunt soň pellehana gelen ispaniýaly Mark Markes (“Repsol Honda”) bilen 5,6 sekunt yza galan italiýaly Andrea Dowizioso (“Ducati”) degişlilikde 2-3-nji ýerleri eýelediler. Çempiony 16-njy bäsleşikde belli bolan Moto GP-de möwsümiň iň soňky ýaryşy 17-nji noýabrda Ispaniýanyň Walensiýa şäherinde geçiriler.