Pähim-paýhas ummany Magtymguly Pyragy ýylynda bagtyýar halkymyz Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyny giňden, dabaraly belläp geçýär. Şanly ýylymyzyň başyndan bäri ýurdumyzda we daşary ýurtlarda beýik söz ussadymyzyň edebi mirasyna bagyşlanan çäreleriň ençemesi geçirildi.
Aşgabatda Magtymguly Pyragynyň doglan gününiň 300 ýyllygy mynasybetli Döwürleriň we siwilizasiýalaryň özara arabaglanyşygy parahatçylygyň we ösüşiň binýady atly halkara forumyň geçirilmegi akyldar şahyrymyzyň at-owazasyny has-da belende galdyrdy.
Bu ýokary derejeli foruma gatnaşmak üçin Ermenistan Respublikasynyň Prezidenti Waagn Haçaturýan, Eýran Yslam Respublikasynyň Prezidenti Masud Pezeşkian, Gazagystan Respublikasynyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Mongoliýanyň Prezidenti Uhnaagiýn Hurelsuh, Pakistan Yslam Respublikasynyň Prezidenti Asif Ali Zardari, Russiýa Federasiýasynyň Prezidenti Wladimir Putin, Täjigistan Respublikasynyň Prezidenti Emomali Rahmon, Özbegistan Respublikasynyň Prezidenti Şawkat Mirziýoýew ýurdumyza geldiler.
Hormatly Prezidentimiziň belläp geçişi ýaly, türkmen halkynyň akyldar şahyry Magtymguly Pyragynyň toýy bu gün dünýäniň toýuna öwrüldi.Dana Pyragynyň parasatly pikirleri asyrlarboýy halkymyz üçin, şeýle-de beýleki halklaryň wekilleri üçin hem durmuş ýörelgesine öwrülip geldi.
Magtymguly Pyragynyň golýazmalar toplumy Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) Dünýäniň hakydasy maksatnamasynyň halkara sanawyna girizilmegi, şahyryň doglan gününiň 300 ýyllygynyň bu abraýly gurama bilen bilelikde bellenilip geçilýän şanly seneleriň sanawyna goşulmagy, şeýle hem Türki medeniýetiň halkara guramasy (TÜRKSOÝ) tarapyndan 2024-nji ýylyň Türki dünýäsiniň beýik şahyry we akyldary Magtymguly Pyragy ýyly diýip yglan edilmegi akyldar şahyrymyza goýlan aýratyn hormat-sarpanyň nyşanydyr.
Nusgawy şahyryň eserleriniň köp dillere terjime edilendigi hem-de olaryň dünýäniň onlarça ýurdunda neşir edilendigi kanagatlanma bilen bellenilip, beýik türkmen şahyrynyň goşgular ýygyndylarynyň, saýlanan eserleriniň çap edilmegini we neşire taýýarlanylmagyny mundan beýläk-de höweslendirmegiň zerurdygy beýan edildi. Şunuň bilen baglylykda, Magtymguly Pyragynyň ensiklopediýalaryny neşir etmek mümkinçiliklerini işjeň öwrenmek üçin uly gyzyklanmalaryň bardygy bellenildi.
Bu neşirde Magtymgulynyň edebi mirasyny öwrenýän alymlaryň ylmy-barlag işleri baradaky maglumatlar toplanylar.Bu barada Magtymguly Pyragynyň doglan gününiň 300 ýyllygyna bagyşlanan Döwürleriň we siwilizasiýalaryň özara arabaglanyşygy parahatçylygyň we ösüşiň binýady atly halkara forumyň Jemleýji resminamasynda bellenilip geçilýär.
Hakykatdan hem türkmen şahyry ähli halklaryň şahyryna öwrüldi. Bu foruma gatnaşmaga gelen Ermenistanyň, Özbegistanyň hem-de Gyrgyz Respublikasynyň Prezidentleri öz ýany bilen özbek, gyrgyz hem-de ermeni dillerine terjime edilen Magtymguly Pyragynyň goşgular ýygyndylaryny getirdiler we Gahryman Arkadagymyza hem-de Arkadagly Gahryman Serdarymyza gowşurdylar.
Akyldar şahyr Magtymguly Pyragynyň döredijiligini wagyz etmek babatda medeni dialog döwletleriň arasynda köpugurly hyzmatdaşlygyň ösdürilmegine uly goşant goşýar. Şeýle hem akyldar şahyrymyzyň halklaryň arasynda dostlugyň we özara düşünişmegiň pugtalandyrylmagyna, olaryň medeniýetleriniň özara baýlaşmagyna ýardam berýän pikirleri ähli ýurtlaryň dilleriniň senasyna öwrüldi. Şunuň bilen baglylykda, hormatly Prezidentimiziň belleýşi ýaly, beýik akyldarymyzyň toýy hakykatdan hem dünýä döwletleriniň toýuna öwrüldi.
Gündogaryň meşhur akyldary Magtymguly Pyragynyň edebi mirasyny dünýä ýaýmakda, iki ýurduň arasyndaky dost-doganlyk gatnaşyklaryny ösdürmekde bitiren hyzmatlary üçin Arkadagly Gahryman Serdarymyzyň foruma gatnaşan dünýä döwletleriniň Baştutanlaryny Magtymguly Pyragynyň 300 ýyllygyna atly ýubileý medaly bilen sylaglamagy bolsa, dost-doganlyk gatnaşyklarynyň nobatdaky dabaralanmasyna öwrüldi.
Şirin ÇARYÝEWA,
Ýagşygeldi Kakaýew adyndaky Halkara nebit we gaz uniwersitetiniň uly mugallymy.