FIFA tarapyndan klublaryň arasynda geçirilýän Dünýä Kubogy ýaryşynda Ýewropanyň wekili “Liwerpul” çempion bolmagy başardy.Iňlis topary Katarda geçirilen ýaryşyň finalynda Braziliýanyň “Flamengo” toparyny 1-0 hasabynda ýeňlişe sezewar etdi.
Esasy wagty golsuz tamamlanan oýunda “Liwerpula” ýeňiş getiren ýeke-täk pökgini 99-njy minutda toparyň braziliýaly hüjümçisi Roberto Firmino derwezä girizdi. Şunlukda, “Liwerpul” topary 2000-nji ýyldan bäri geçirilip gelinýän bu ýaryşda ilkinji gezek kuboga mynasyp boldy.
Olar 2005-nji ýylda finalda Braziliýanyň başga bir topary “Sao Paulodan” ýeňlipdi.Ýaryşda Demirgazyk Amerikanyň çempiony “Monterreý” 3-nji orny eýeledi.Meksikanyň topary bu ugurda Aziýanyň çempiony “Al-Hilaldan” üstün çykmagy başardy.
Esasy wagty 2-2 deňlikde tamamlanan duşuşykda ýeňiji 11 metrlik urgular arkaly kesgitlenip, 4-3 öňe saýlanan “Monterreý” bürünç medala mynasyp boldy. Ýaryşyň iň ökde oýunçysy diýlip, “Liwerpul” toparynyň müsürli ýyldyzy Mohamed Salah saýlandy.