Lebap welaýatynyň Darganata etrabynyň Gazojak şäherinde täze ýaşaýyş jaýynyň ulanylmaga berilmegi mynasybetli dabara boldy.Gaz çykaryjylaryň maşgalalarynyň 16-sy 3 we 4 otagly öýleriň açarlaryny aldylar. “Türkmengündogarnebitgurluşyk” trestiniň 5-nji GMU-nyň gurluşykçylary “Lebapgazçykaryş” önümçilik müdirliginiň tabşyrygy boýunça täze jaýy bina etdiler. Öýlerde döwrebap dizaýn, otaglarynyň oňaýly ýerleşişi, giň otaglar, mebeller we beýleki zerur enjamlar bilen üpjün edilen aşhanalar ýaly amatly şertler döredilen. Ýarym asyr mundan ozal Türkmenistanyň gaz çykaryş senagatynyň ösüp başlan ýeri bolan Üňüz aňyrsyndaky Garagumda häzirki wagtda diňe bir tebigy ýangyç alynman, eýsem ol gaýtadan hem işlenilýär.
Munuň üçin Garaşsyzlyk ýyllary Naýypda gazy gaýtadan işleýän döwrebap toplum guruldy, onda çykarylýan suwuklandyrylan gaz eksporta, uglewodorod kondensaty bolsa Seýdiniň nebti gaýtadan işleýän zawodyna ugradylýar, bu ýerde ondan dünýä bazarlarynda ýokary islegli açyk reňkli nebit önümleri alynýar.