Lebabyň Türkmenabat şäherinde, ýurtda dowam edýän ykdysady kynçylyklaryň arasynda ilatyň güzeran eklenjiniň agyrlaşmagy bilen, Türkmenistanyň Demokratik partiýasynyň (TDP) we Magtymguly adyndaky Ýaşlar guramasynyň (TMÝG) agzalygyndan çykmak isleýän býujet işgärleri göz-görtele köpelýär.
Bu raýatlaryň islegleri ret edilip, olar edara-kärhanalaryň ýolbaşçylarynyň basyşlaryna sezewar edilýärler. Bu barada Azatlyk Radiosynyň habarçysy 27-nji ýanwarda sebitden maglumat berdi.
“Partiýanyň agzalyk tölegleri üçin her aý aýlygymyzdan 2%-ni alyp galýarlar. Meniň aýlygym şeýle-de az, meniň üçin her manat gymmatly. Hususan-da, azygyň we beýleki durmuş hyzmatlarynyň gymmatlamagy bilen, ýakynda men mekdebiň okuw işleri boýunça orunbasaryna partiýadan we guramadan çykmak isleýändigimi we agzalyk töleglerini tölemek islemeýändigimi aýtdym” diýip, Türkmenabadyň orta mekdepleriniň biriniň mugallymy anonimlik şertinde aýtdy.
Türkmenistanda häkimiýet başyndaky Demokratik partiýanyň we Magtymguly adyndaky ýaşlar guramasynyň agzasy bolmak, esasan, býujet işgärleri we talyplar üçin hökmany bolup durýar. Olar zähmet we talyp haklaryndan her aý 2 göterimini partiýanyň we ýene 2 göterimini guramanyň agzalygyna geçirmeli bolýarlar.
Mugallym islegini beýan etmeginiň yzysüre basyşlaryň başlanandygyny, soňra-da welaýat Baş bilim müdirliginiň kadrlar bölümine çagyrylandygyny we ol ýerde dürli haýbatlara sezewar edilendigini belledi.
“Eger Demokratik partiýadan çyksañ, işiňde kynçylyklar ýüze çykyp biler. Agzalyk tölegini tölemekden ýüz öwürseň, günüň kyn bolar. Çagalaryň barada alada et diýip, bilim resmileri aýtdylar. Bu haýbatlardan soň men özümi gul ýaly duýdum” diýip, mugallym gürrüň berdi.
Habarçymyz bilen söhbetdeş bolan býujet işgärleriniň başga-da ençemesi öz edara ýolbaşçylaryna agzalýan partiýadan we guramadan çykmak isleýändiklerini aýdanda, şuňa meňzeş ýagdaýlary başdan geçirendiklerini gürrüň berdi.
“Edaramyzyň ýolbaşçysy bu talabyňy dowam etdirseň, ornuňa tölejek we şu ýerde işlejek adam taparys diýdi. Şondan soň sesimi çykarman yzyma gaýtdym” diýip, Türkmenabadyň jemagat gullugynyň bir işgäri anonimlik şertinde aýtdy.
Türkmenabat şäher häkimligindäki ynamdar çeşmämiz bu maglumatlary tassyklap, talyplaryň arasynda hem partiýadan we guramadan çykmak isleýänleriň bardygyny belleýär.
“Agzalyk tölegleri köp raýatyň, şol sanda talyplaryň maliýe ýagdaýyna goşmaça ýük bolýar. Ýolbaşçylar bolsa, adamlaryň partiýalardan we guramalardan köpçülikleýin çykmagy sebitiň maliýe binýadyna zarba urar diýip gorkýarlar. Şol sebäpli olara işden, okuwdan kowmak we ýurt baştutanynyň syýasatyna garşylykda aýyplamak bilen haýbat atyp, olary bu islegden çekilmäge iterýärler” diýip, çeşmämiz aýtdy.
Azatlygyň bu ýagdaýlar barada sebitiň häkimiýetlerinden, şol sanda şäher häkimliginden we agzalan edaralardan telefon arkaly teswir almak synanyşyklary oňyn netije bermedi.
Türkmenistanda edara-kärhanalaryň işgärleri we talyplar agzalyk töleglerinden başga-da, her aý takmynan 30-40 manady gazet-žurnallara abuna ýazylmak üçin geçirýärler.
Olar bulardan başga-da, her aý dürli maksatlar üçin näresmi pul goşundylaryny bermäge mejbur edilýärler. Bularyň arasynda, köpçülikleýin çäreler, arassaçylyk we oba hojalyk işleri, şol sanda pagta ýygymy, şugundyr we ýeralma ýygnamak işleri ýaly maksatlar bar.
Habarçylarymyz ýurtda dowam edýän ykdysady kynçylyklaryň, giň ýaýran işsizligiň we durmuş gymmatçylygynyň arasynda, pul goşundylarynyň raýatlaryň maşgala býujetine barha köp agram salýandygyny aýdyp gelýärler.
Maglumat üçin aýtsak, Türkmenistanyň Demokratik partiýasy 1991-nji ýylyň 16-njy dekabrynda we Magtymguly adyndaky ýaşlar guramasy şol ýylyň 16-njy noýabrynda döredildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.