Ispaniýanyň çempionaty “La Ligada” 37-nji tapgyrda-da çempion belli bolman, dalaşgärleriň sany 2-ä düşdi. “Barselonanyň” öz meýdançasynda “Seltadan” 2-1 (Santi Mina 38, 89 Lionel Messi 28) asgyn gelmeginden soň, katalonlaryň çempion bolmak mümkinçiligi galmady.
Duşuşykda ýer eýeleriniň ýeke-täk goluny geçiren Lionel Messi “La Ligada” oýnan duşuşyklarynyň 300-njisinden tapawutlandy.Messi “La Ligada” 9-njy gezek bir möwsümde azyndan 30 gol geçirdi.
Sanawyň lideri “Atletiko” kynlyk bilenem bolsa, “Osasunadan” 2-1 üstün çykdy. Myhmanlar 75-nji minutda Budimiriň goly bilen öňe saýlansa-da, 82-nji minutda Renan Lodi, 88-nji minutda-da Luis Suares tapawutlanyp, toparyna ýeňiş getirdi.
Geçen möwsümiň çempiony “Real Madrid” bolsa myhmançylykda “Atletik Bilbaony” Naçonyň goly bilen 1-0 hasabynda ýeňip, çempion bolmak mümkinçiligini soňky tapgyra çenli uzaltdy.
Soňky tapgyrda 83 utukly “Atletiko Madrid” myhmançylykda ligada galmak üçin göreşýän “Walýadolid” bilen, “Real Madrid” bolsa öz meýdançasynda 7-nji ýerdäki “Wilýarreal” bilen duşuşar.