Madridiň Realynyň we Germaniýanyň futbol boýunça milli ýygyndysynyň ýarym goragçyys Toni Kroos Ýewro ― 2024-den soň futbol karýerasyny ýapmakçy.
Meni Madridde ak göwün bilen garşylan we maňa ynanan her kime minnetdarlyk bildirýärin.Bu ýerdäki ilkinji günümden ahyrky günüme çenli meni goldandygyňyz üçin bolsa aýratyn hoşallygym bar. Şeýle diýmek bilen, şu tomusda geçiriljek Ýewropa çempionatyndan soňra futbolçylyk karýeramy ýapjakdygymy habar berýärin.
Hemişe aýdyşym ýaly, Real meniň iň soňky toparym bolar. Çözgüt kabul etmekde dogry wagty saýlap alandyryn öýdýän diýip, 34 ýaşly Kroos Instagramdaky hasabynda ýazdy. Şeýle hem ol: Häzirki esasy maksadym 15-nji kuboga gitmek diýen sözleri goşdy.
Toni 2014-nji ýyldan bäri Realyň köýnekçesini geýýär. Ol häzirki möwsümde 45 duşuşyga çykdy, olarda bir gol geçirip, 8 goluň assistini berdi. Ýaşynyň ulalýandygyna garamazdan, Transfermarkt häzir hem Kroosa 12 million ýewro baha kesýär.
Futbolçy 14-nji iýun ― 14-nji iýul aralygynda geçiriljek Ýewropa çempionatyna gatnaşmak üçin Germaniýanyň milli ýygyndysyna çagyryldy.