2024-nji ýylyň 22-nji noýabrynda Aşgabatda koreý medeniýetiniň iki günlük festiwalyna badalga berler. Koreýa Respublikasynyň Türkmenistandaky ilçihanasy tarapyndan guralýan çäre Arkaç söwda-dynç alyş merkezinde geçiriljek tölegsiz medeni maksatnamadan we Magtymguly adyndaky milli sazly drama teatrynda görkeziljek gala-konsertden ybarat bolar.
Festiwalyň birinji güni türkmen paýtagtynyň ýaşaýjylary we myhmanlary Arkaç söwda-dynç alyş merkezinde Koreýanyň medeniýetiniň ýatdan çykmajak täsirleri galdyrjak çäresine gatnaşyp bilerler. Sagat 17:00-dan 19:00-a çenli bu ýere gelýänler üçin tematiki surat meýdançasy, dürli öwüşginli täsin sowgatlyklary ýasamak boýunça ussahana hereket eder, şeýle hem bu ýerde milli koreý tagamlaryny dadyp görmek mümkinçiligi dörediler.
Medeni maksatnamanyň jemleýji çäresi 23-nji noýabrda koreýaly artistleriň Türkmenistanyň Döwlet simfoniki orkestri bilen bilelikde çykyş etmegi bilen geçiriler. Konsert Magtymguly adyndaky milli sazly drama teatrynda bolar.
Konsertiň biletlerini Koreýanyň ilçihanasyndan 20-nji we 21-nji noýabrda sagat 10:00-dan 20:00-a çenli, günortan arakesmesinden (12:30-dan 13:30-a çenli) başga wagtda mugt alyp bilersiňiz.