Koreýa Respublikasynyň Prezidenti Ýun Sok Ýoluň Türkmenistana sapary wagtynda Daewoo Engineering & Construction gurluşyk kompaniýasynyň başlygy Çjun Won Çju iş wekiliýetiniň düzüminde türkmen hünärmenleri bilen birnäçe möhüm duşuşyk geçirdi.
Wise-premýer Batyr Amanow, Türkmengaz, Türkmennebit we Türkmenhimiýa döwlet konsernleriniň ýolbaşçylary bilen Daewoo E&C-niň başlygynyň arasynda geçirilen gepleşikleriň dowamynda iki ýurduň arasyndaky hyzmatdaşlygy has-da giňeltmek üçin amatly maýa goýum ýagdaýy bellenilip geçildi. Bu barada The Korea Herald habar berdi.
Daewoo E&C Gyýanly we Türkmenabat şäherlerinde mineral dökünleri öndürýän iki sany uly zawodyň, şeýle hem akylly Arkadag şäheriniň taslamasynyň ikinji tapgyryna gatnaşmak isleýändigini mälim etdi.
Geçen ýylyň noýabr aýynda Daewoo E&C kompaniýasynyň Türkmenistanyň çalt ösýän bazarynda has netijeli işlemek üçin Aşgabatda şahamçasyny açandygyny ýatladýarys.
— Türkmenistanyň baý tebigy baýlyklary täze şäherleri, senagat desgalaryny we infrastrukturany ösdürmek ýaly dürli pudaklarda işewürlik üçin ägirt uly mümkinçiliklere eýe — diýip Daewoo E&C-niň başlygy aýtdy. — Bu taryhy döwlet saparyndan soň ýurtlarymyzyň arasyndaky dostlukly gatnaşyklary has-da berkitmek arkaly Merkezi Aziýa bazaryndaky ornumyzy berkitmäge borçlanýarys.