Russiýanyň Goranmak ministrliginiň Metbugat geňeşçisi Igor Konaşenkow, Russiýanyň harby güýçleriniň 24-nji fewraldan bäri dowam edýän Russiýa-Ukraina söweşindäki hereketleri barada maglumat berdi.
Harkow sebitinde Ukrainanyň Ýaragly güýçleriniň 92-nji Mehanizirlenen brigadasynyň pozisiýalaryna garşy guralan hüjümleriň netijesinde 150-ä golaý esger bilen 14 sowutly ulagyň we awtoulagyň ýok edilendigini aýdan Konaşenkow, Herson we Nikolaýew sebitlerinde 63-nji Mehanizirlenen brigadasyna degişli 70 esger bilen 14 awtoulagyň ýok edilendigini beýan etdi.
"Kraken" brigadasynyň söweşjeň ukybyny ýitirendigini aýdan Konaşenkow, Russiýanyň goşunynyň Ukrainadaky harby elementlere garşy hüjümleriniň dowam edýändigini mälim etdi.
Soňky 24 sagatda Ukrainanyň goşunyna degişli 5 dolanşyk merkeziniň, 5 ok-däri ammarynyň we ýangyç ammarynyň ýok edilendigini, 7 uçarmansyz howa ulagynyň hem od açylyp ýere gaçyrylandygyny aýdan Konaşenkow: "Ukrainanyň Harkow, Zaparožýe we Herson sebitlerinde ABŞ önümi bolan 19 sany HIMARS raketasy howada täsirsiz ýagdaýa getirildi" diýip habar berdi.
Konaşenkow: "Ukrainada şu günki güne çenli 263 uçar, 145 dikuçar, 1708 uçarmansyz howa ulagy, 363 howa goranyş raketa ulgamy, 4 müň 269 taňk we sowutly ulag, 791 köp nilli raketa ulgamy, 3 müň 276 gaubisa we minomýot we 4 müň 774 ýörite harby awtoulag ýok edildi" diýip beýan etdi.